Kryeministri i Sllovakisë, Roberto Fico pretendon se Presidentja e Komisionit Europian e ka kritikuar, pas një telefonate që pati me Presidentin e SHBA-ve, Donald Trump në një kohë kur u vendosën tarifat ndaj produkteve të BE-së nga ana e Uashingtonit.
Fico iu referua një telefonate shpërthyese që kishte gjatë kësaj të hëne me Von der Leyen.
Udhëheqësi sllovak pretendon se Von der Leyen e nënçmoi dhe e quajti atë “idiot”. “Ne diskutuam dy çështje”, tha Fico, duke shtuar se e para ishin tarifat e Trump kundër Evropës.
“Robert, çfarë bëre? Pse pikërisht negociove me Trump? A je plotësisht i humbur?”, ishin fjalët e von der Leyen, siç pretendon Fico.
“Ajo më nënçmoi për gjysmë ore, duke më thënë se jam një idiot i madh”, shtoi kryeministri sllovak.
Në të njëjtën kohë, Fico thotë se i shprehu habinë e tij Presidentes së KE, për faktin se Macron mund të flasë me Trump, ndërsa ai nuk mundet.
“Ai ishte në Uashington me Trump, pra ai është djali i mirë dhe unë jam i keqi?”, pyeti kryeministri sllovak.
Ai tha gjithashtu se Europa po pret “një surprizë të madhe më 2 prill”, kur tarifat e Trump të hyjnë në fuqi, “por ne ende nuk e dimë se sa e madhe do të jetë”.
Megjithatë, kryeministri sllovak më vonë u tërhoq nga deklarata e tij, duke thënë se debati me Von der Leyen ishte një shaka që “jo të gjithë e kuptonin”.
“Shpresoj që presidentja e Komisionit Europian ta ketë kuptuar batutën e konferencës së sotme për shtyp, kur u thashë gazetarëve se presidentja e KE-së më qortoi tmerrësisht, pavarësisht nuk bëra asgjë, siç pretendon opozita sllovake, për të penguar SHBA-në të vendosë tarifa doganore të reja kundër gjithë botës. Kam frikë se mediat sllovake dhe opozita nuk e kuptuan shakanë”, shkroi Fico.
