Nga Artur Ajazi
Ditët e fundit (pas dorëzimit të listave në KQZ) në kampin apo koalicionin opozitar, ka rënë disi “hareja”. Nuk është më ai “optimizmi dhe besimi” i dikurshëm. Nuk shprehet më kurajo e “padiskutueshme” e atyre që kryetarin e shihnin si “kryeministrin e ardhshëm”. Duket sikur gjithçka ka mbaruar para kohe, ashtu siç edhe është parashikuar të ndodhë në 25 Prill. Jo vetëm ata që u “fshinë” nga lista me një të rënë të lapsit, por edhe ata që janë në listë, nuk duken se po garojnë, por sikur po belbëzojnë jo vetëm para kryetarit, por edhe kamerave. Dhe nuk është ndonjë “çudi e madhe”, të ndodhë kështu.
Opozita dhe koalicioni i saj i plakur, e ndjejnë se pas pak ditësh Edi Rama, do të shpallë programin e madh të 4 vjeçarit të ardhshëm.E dinë se ai,po e përmbyll me sukses programin e rindërtimit, e dinë se ai po u ndjek hap pas hapi personalisht, programin e vaksinimit dhe perfeksionimit të shërbimit spitalor, e dinë se ai shumë shpejt do të marrë një ftesë të shumëpritur nga BE, etj, etj.. Ndoshta nuk e kishin menduar se Edi Rama, do t’ja dilte. Kjo për faktin se gjithçka kishte parashikuar Doktori për qeverisjen e tij, ka rezultuar një zhgënjim i madh.
Ata tashmë janë thjesht numra, thjesht emra të një liste që nuk ngjall aspak shpresë, por shpesh edhe neveri. Ata janë pjesë të një ekipi humbësish të pafund, që nuk dinë të kullandrisin as fushatën elektorale, apo të bëjnë për vehte, mbështetësit që ti votojnë. Në Vlorë “plas pushka” e Bujar Leskajt, në Korçë Salianji sherr dhe debate të ashpra me kryetarin e degës së PD, në Elbasan Gazi çdo ditë bën debate me të larguarit e kryetarit, të cilët i kanë shërbyer atij në “ditë të vështira”, në Durrës dega e PD ka prej 3 vitesh 4 kryetarë, ku seicili punon dhe vegjeton për hesapin e tij, në Shkodër demokratët kanë mbetur të dyzuar për votën, dhe shumica mbështesin zonjën Topalli. Hajde bëj fushatë me një parti të copëzuar, dhe hajde motivo dhe mbaj me gajret ata që i ke futur në lista po deshe. Brënda vetë koalicionit opozitar, ka kohë që ekziston gjendja e “luftës së ftohtë”, edhe pse duken sikur “nuk e kanë me njëri-tjetrin”. Kjo nuk është aspak gjendje normale, brënda një koalicioni që pretendon se “do të fitojë zgjedhjet dhe vijë në pushtet”. Ndaj dhe “hareja”, gëzimi dhe buzëqeshja u ka ngrirë në buzë listarëve të opozitës.
Edhe pse u mundua të krijojë pak “atmosferë” në Kavajë duke mbledhur dhjetra mbështetës, kryetarit të opozitës i shihet në çdo dalje para kamerave, pezmatimi, mungesa e kurajos dhe besimi për t’ja dalë. Dhe nuk ka se si të ndodhë ndryshe. Kjo “puna e pushtetit”, kërkon të jesh “shpatullgjërë, babaxhan, parashikues, kurajoz, dhe guximtar” o kryetari Basha. Duhet të dalësh i pari në betejë dhe jo në listë, duhet të dalësh i pari nga shtëpia duke e prishur gjumin dhe jo i fundit, duhet të guxosh dhe të mendosh se ka shumë njerëz që kanë nevojë për ty, dhe jo të presësh të dalë dhe të perëndojë “dielli”, pastaj të kujtohesh se je ti kryetari….
