Në rezidencën e presidentit të ndjerë Ibrahim Rugova, ende ruhet “dhoma e kristaleve” siç e quante ai. Në këtë hapësirë ngjitur me dhomën e pritjes së delegacioneve, gjenden gurët e njohur të Rugovës. Këta gurë, Rugova i pati shndërruar në simbol të Kosovës duke ua dhuruar liderëve të ndryshëm botëror. Por kjo nuk është e vetmja veçanti e koleksioneve të tij. Disa nga gurët akoma janë të vendosur në kavanoz të mbushur me ujë nga vetë duart e presidentit historik. Rugova nuk ishte me profesion studiues i gurëve, por ishte i fiksuar pas tyre. Ai dëshironte të dinte se çfarë reaksione kimike do të ndodhin në këto kavanoza të mbushura me ujë dhe gurë të ndryshëm. Gurët që ndodhen në “dhomën e kristaleve”, Rugova i kishte marrë si dhurata nga njerëz anëkend Kosovës. Disa nga ta janë nga Trepça, nga nëntoka e rajonit të Drenicës, ndërkaq më të famshmit janë nga Kamenica. Këtë lloj guri që po e shihni në foton më poshtë i nxjerrë në rajonin e Kamenicës, Rugova ia ka dhuruar presidentit Bill Clinton dhe kryeministrit britanik Tony Blair, referon lajmi.net.
