Sali Berisha dhe Ilir Meta kanë folur gjatë të gjithë verës për një shtator të vrullshëm e me protesta, që sipas tyre ‘do të rrëzojnë regjimin e Edi Ramës’.
Por, java e parë e shtatorit thuajse iku dhe parlamenti nisi sesionin e ri parlamentar, as i pari dhe as i dyti nuk kanë dhënë një datë se kur do të mbajnë protestën e parë. Që të dy ata u janë shmangur pyetjeve të gazetarëve duke thënë ‘së shpejti’.
Sali Berisha deklaroi dy ditë më parë se kishte zhvilluar një takim me Ilir Metën për të koordinuar aksionin opozitar, siç tha ai. Takimi mes tyre është niveli më i lartë i komunikimit mes dy kampeve, ndërsa burime të Voxnews.al konfirmojnë se prej kohësh ata janë në koordinim të konferencave e deklaratave për shtyp.
Koordinimi bëhet përmes zyrave të shtypit, që shmangin daljen e njëkohshme të tyre me qëllim ushtrimin e presionit sa më të lartë ndaj Qeverisë së Edi Ramës dhe mazhorancës socialiste, duke e kërcënuar me protesta. Megjithatë, vetëm kaq! As Berisha dhe as Meta nuk kanë dhënë dot një datë deri më tani.
Berisha e testoi veten në protestën e 7 korrikut. Pjesëmarrja është vlerësuar si e kënaqshme nga ish-Kryeministri, që është gati të thërrasë protestën tjetër. Por, ai po bën llogaritë, thonë burimet e Voxnews.al, nëse organizimi i protestës bashkë me Metën ka efekte pozitive, apo negative.
Nuk është sekret që në bazën e PD-së, e njëjta bazë që rrëzoi Lulzim Bashën, Ilir Meta nuk gëzon respekt, madje fajësohet nga shumë prej tyre si njeriu që solli dhe fuqizoi në pushtet Edi Ramën me koalicionin e 1 prillit të 2013-s.
Nga ana tjetër, Ilir Meta është më i gatshëm për protesta, por i trembet faktit se thirrja e një të tillë pa siguruar mbështetjen e Sali Berishës do të dështonte në pjesëmarrje. Meta përmend shpesh popullin e 2 marsit, duke iu referuar protestës që thirri si President republike më 2 mars të 2020, por ai e di më mirë se të gjithë që në atë protest pati me vete mbështetjen edhe të Partisë Demokratike, që në ato ditë drejtohej nga Lulzim Basha.
Ditët në vazhdim do të provojnë se cilën rrugë do ta gjejë si zgjidhje Sali Berisha në dilemën e vet. Nëse do të thërrasë protestë bashkë me Metën, apo i vetëm. Nëse zgjedh këtë të dytën, ai i druhet fragmentarizimit të aksionit opozitar, me të parën fragmentarizimit të bazës së demokratëve.
Meta nga ana tjetër duket se ka më pak mundësi zgjedhjeje. Atij i nevojitet me patjetër që të sigurojë një protestë para se socialistët të avancojnë me projektligjin për hapjen e dosjeve dhe ta përdorë këtë protestë si mjet presioni ndaj mazhorancës. E në këtë rast, sa më e madhe pjesëmarrja, aq më i lartë presioni ndaj socialistëve./Vox News/m.j
