Partia Socialiste zgjodhi dje delegatët e saj të Kongresit të 19 marsit në katër qarqe. Socialistët e Tiranës, Durrësit, Shkodrës e Kukësit e mbyllën dje këtë proces, ndërkohë që mbetet për në 5 mars edhe rajoni Vlorë–Gjirokastër, shkruan Gazeta Shqiptare.
Ndërkaq, zgjedhjet për kryetarët e PS-së në 61 bashkitë pritet të mbahen pas Kongresit. Sekretari për Çështjet e Koordinimit, njëherësh deputeti Fatmir Xhafaj deklaroi dje për mediat se drafti me ndryshimet në statut është gati, por ai pritet që t’u paraqitet anëtarëve të Asamblesë Kombëtare, që mund të mblidhet një javë para Kongresit.
“Me miratimin e statutit të ri në Kongres, do të fillojë dhe procesi i zgjedhjes së forumeve të reja drejtuese të PS-së nga njësitë administrative në bashkitë, në asambletë e bashkive, 61 bashki, dhe pastaj janë asambleja kombëtare, kryesia, sekretariati, kryetari dhe gjithë forumet e tjera drejtuese”, tha Xhafaj për gazetarët.
Duke pohuar se të gjithë do zgjidhen pas Kongresit, ai sqaroi se PS-ja ka një strukturim të organizimit të partisë. “Partia tashmë është e ndërtuar me një format të ri që i përgjigjet reformës së re administrative. Ka një konflikt midis statutit në fuqi dhe organizimit të ri territorial, pra statuti flet për komunat, flet për rrethet etj., etj. Ndërkohë që sot flasim për përgjithësi të qeverisjes vendore në sensin e njësive të administrimit dhe bashkive”, – tha Xhafaj. Sipas tij, tashmë ka përfunduar edhe statuti dhe relacioni që do ta shoqërojë atë, dhe do t’i paraqitet së shpejti Asamblesë Kombëtare.
Në lidhje me debatin e iniciuar nga deputeti kritik, Ben Blushi për zgjedhjen e kryetarit të PS-së, Xhafaj tha se: “I gjithi ky debat, përtej retorikës së tepruar në ndonjë rast të veçantë, është një debat i shëndetshëm. Përfytyrojeni PS-në që të mos ketë debat; është një gjë e papranueshme, nuk do ishte kjo PS”.
Nga qarku Tiranë, PS-ja nxori dje 128 delegatë, nga Bashkia Kamëz 16 delegatë dhe nga Bashkia Vorë 6 delegatë. Socialistët e Durrësit votuan për 33 delegatë, ndërsa Kukësi do të ketë 33 delegatë në Kongres e Shkodra 55. Kryetari i PS-së, Edi Rama votoi dje në komunën Dajt, pranë banesës së tij të re. Ai u shpreh se ndihet krenar për PS-në.
“Unë jam krenar për PS-në dhe shfrytëzoj rastin që t’u bëj thirrje të gjithë atyre që duan të shikojnë një orë e më parë rezultatet e reformave tona që t’i bashkohen PS-së, sepse është e vetmja fuqi që siguron ecjen e Shqipërisë në drejtimin e duhur dhe që ka kapacitete morale, intelektuale dhe politike për të transformuar Shqipërinë përmes reformash”.
GSH
