“E kuptojmë hallin e Partisë Demokratike dhe të kandidatit Halim Kosova në këtë fushatë.
As PD e as Halim Kosova nuk flasin dot për Tiranën. Nuk premtojnë dot asgjë për qytetarët pasi çdo premtim i tyre llogaritet si dështim i Lulzim Bashës.”, tha deputetja e Partisë Socialiste Olta Xhaçka në një deklaratë për mediat nga selia rozë.
Xhaçka tha gjithashtu se ishte pikërisht Basha ai që premtoi gjithçka dhe nuk realizoi asnjë nga premtimet e bëra për Tiranën. Nga rrugët deri tek hapsirat e gjelbërta, Xhaçka tha se janë dështime të Bashës.
“Nuk flasin dot për rrugët me gropa, pasi i ka lënë Luli në këtë derexhe. Nuk flasin dot për rrugët e rrugicat pa ndriçim, sepse sigurisht edhe kjo është punë e Lulit. Nuk flasin dot as për hapësirat e gjelbra e as për transportin publik, pasi qytetarëve u kujtohet trami i famshëm i Lulit. Dhe, sigurisht, nuk flasin dot as për dështimin e Bashkisë Tiranë për të trajtuar me ndihmë ekonomike familjet në nevojë apo për banesat sociale që i gjetën gati dhe ishin aq të paaftë sa nuk arritën as t’i shpërndajnë në 4 vjet.”, kujtoi Xhaçka
Nga ana tjetër në deklaratën e dhënë deputetja socialiste rreshoi sukeset Veliajt si ministër dhe tha se është i duhuri për Tiranën
“Prandaj, e vetmja zgjidhje që kanë është të shpifin përditë për Erion Veliaj dhe punën e tij të shkëlqyer si ministër i mirëqenies sociale.
Akuza e sotme, është e turpshme. Qeveria e Sali Berishës, ku Halim Kosova ishte ministër, nuk ofronte ndihme ekonomike por qoka politike. Qoka për ata që votonin Lulin dhe Saliun, për kryetare PD-je me biznese e dyqane, por jo ndihmë për ata në nevojë. Në më pak se dy vite, Ministri Veliaj zhduku abuzimin me ndihmën ekonomike për militantët politike dhe shtoi paratë në mbështetje të atyre që kishin realisht nevojë.
Nga 3500 lekë që merrte mesatarisht një familje në ndihmë ekonomike në Tiranë në kohën kur Halim Kosova ishte ministër i Sali Berishës, sot një familje në nevojë merr mesatarisht 5300 lek në muaj, ose më thjesht 51% më shumë. Kjo për faktin e thjeshtë se lista është pastruar nga militanët dhe abuzuesit që kishte futur aty Partia Demokratike.
Qytetarët e shohin dhe e prekin vetë ndryshimin që ka sjellë në këto dy vjet Erion Veliaj në Ministrinë e Mirëqenies Sociale. Pas 21 qershorit edhe qytetarët e Bashkisë të Tiranës do të kenë më në fund një kryetar bashkie që di të punojë për ta dhe për ndërtimin e një kryeqyteti modern, europian. “, tha në deklaratën për shtyp nga Partia Socialiste deputetja Olta Xhaçka
