Deputetja e Partisë Socialiste, Olta Xhaçka kërkoi të dielën që Kryetari i Partisë Demokratike, Lulzim Basha të dënojë publikisht deputetët e PD-së që rezultojnë të inkriminuar.
“Për muaj me radhë, Lulzim Basha e Sali Berisha hodhën baltë e akuzuan mazhorancën se paska patur 19 kriminelë në grupin e saj parlamentar, por tani që u bënë deklarimet, jo vetëm që 19 kriminelët dolën imagjinarë, por rezulton se të dënuarit me burg janë në radhët e Partisë Demokratike”, deklaroi Xhaçka.
“Sali Berisha e Lulzim Basha nuk guxojnë të flasin as për Flamur Nokën që ka bërë deklarim të rremë duke u bërë subjekt i ligjit të dekriminalizimit, as për Alban Zenelin, deputetin e dënuar dy herë me burgim, e as për Arben Ristanin, sekretarin e tyre të përgjithshëm i cili rezulton i dënuar me të paktën 5 muaj burg për veprime antikushtetuese”, shtoi ajo.
Nëse për Bashën e Berishën çdo qytetar është i barabartë përpara ligjit, sipas Xhaçkës, duhet të paktën ta thonë një fjalë e të dënojnë deputetët e tyre që rezultojnë të inkriminuar. “Në të kundërt, askush nuk mund t’i besojë se dekriminalizimi për ta ka qenë një përpjekje e sinqertë për të pastruar parlamentin nga të ashtuquajturit njerëz me të shkuar kriminale. Në të kundërt, konferencat e tyre për shtyp janë thjesht një farsë që synojnë të baltosin këdo e t’i bëjnë pis të gjithë në një përpjekje për të fshehur të vërtetat për veten e tyre, që mesa duket po ua mësojnë edhe të tjerët”, tha në përfundim deputetja Xhaçka.
