Kreu i KQZ, Klement Zguri, ka reaguar pas kërkesës së Partisë Socialiste për shkarkimin e kryebashkiakut të Mallakastrës, Agron Kapllanaj.
Zguri deklaroi se vetëm Kolegji Zgjedhor mund të gjykojë vendimet e KQZ-së dhe përderisa nuk ka një ankimin, vendimi i marrë është i drejtë.
Jashtë sallës ku u zhvillua mbledhja e Komisionin e Ligjeve, ku po shqyrtohet projektbuxheti i vitit 2018 për KQZ, ai theksoi se nuk merret me deklarata politike. Ai theksoi se për të nuk ka asnjë ankimim deri tani në Kolegjin Zgjedhor.
“Kush është instuticioni që vlerëson një vendim të KQZ nëse është i ligjshëm. Kolegji Zgjedhor dhe Gjykata Administrative gjykojnë vendimet e KQZ, Fakti që ky vendim nuk ankimohet tregon se është i ligjshëm. Unë nuk merrem me debate politike, i qëndroj statusit tim. Mund të verifikoni nëse ka shkelje“, tha Zguri.
Kërkesa e PS për shkarkim erdhi pas vendimit të KQZ për të mos i hequr mandatin Kapllanajt, i cili sipas socialistëve preket nga ligji i dekriminalizimit, pasi rezulton të jetë dënuar në Itali me dy vite burg për vjedhje në vitin 2004./a.ç
