Ka nisur këtë të shtunë regjistrimi i emigrantëve përmes Platformës Elektronike të Regjistrimit (PER), në mënyrë që të kenë mundësi të shprehin vullnetin e tyre politik pa qenë nevoja të vijnë në Shqipëri për të votuar për zgjedhjet parlamentare të 11 Majit.
Procesi i regjistrimit të emigrantëve do të zgjasë deri në 4 mars dhe Partia Socialiste duket se ka për qëllim ta shfrytëzojë maksimalisht këtë hapësirë kohore për të ndihmuar mbështetësit e saj në diasporë që të bëhen pjesë e procesit.
Sipas vendimeve që u morën ditën e djeshme në një mbledhje të grupit të PS, kryeministri Edi Rama ka kërkuar nga të vetët që të regjistrojnë emigrantët, të cilët duhet të jenë votues potencial të mazhorancës.
Për këtë arsye të majtët këtë fundjavë kanë zbarkuar në Itali dhe Greqi, duke ngritur edhe zyra që do të ofrojnë “asistencë teknike” me njerëz të dedikuar në qytetet me më shumë emigrantë shqiptarë.
Rama ka vendosur që drejtuesit politik të Vlorës, Gjirokastrës, Fierit (Belinda Balluku, Bledi Çuçi, Mirela Kumbaro), së bashku me deputetet Lindita Nikolla, Evis Kushi dhe Silda Anagnosti por edhe disa zv/ministra do të kujdesen për regjistrimin e emigrantëve në Athinë.
Bledi Çuçi sot në Athinë ka inspektuar zyrën e parë të asistencës, që sipas tij është ngritur nga PS në Atikën veriore, nga ku ka nisur edhe regjistrimi i votuesve të parë jashtë vendit.
“Njerëzit tanë janë në dispozicion për të orientuar votuesit e qarkut Vlorë e këdo që ka nevojë për ndihmë e për të lehtësuar këtë proces historik. Kushdo që nuk e kryen dot vetë regjistrimin në faqen e KQZ le të paraqitet në këto zyrat për asistencë”, shkruan Çuçi në një postim në rrjetin social ‘Instagram’.
