Partia Socialiste është e gatshme për t’u ulur me PD për të diskutuar në lidhje çështje të rëndësishme.
Ky ishte mesazhi i dhënë nga kreu i grupit parlamentar të PS Taulant Balla në një prononcim për mediat pas përfundimit të mbledhjes së Asamblesë.
“Vazhdojmë ta mbajmë dorën e shtrirë, dëshirën tonë të pakushtëzuar për t’u ulur me PD sapo të fillojë legjislatura e re parlamentare, nëse PD është gati, për të diskutuar për gjërat e rëndësishme që secila prej palëve ka në një demokraci funksionale.
Mazhoranca ka detyrat e veta, opozita ka detyrat e veta, por ajo që presin qytetarët prej nesh është që t’i japim fund kësaj sherrnaje, të gjatë politike dhe të gjejmë gjuhën e përbashkët për të punuar në funksion në çuarjen e reformave që kërkojnë një shumicë të cilësuar në Kuvend, gjë të cilën nuk e kemi”, tha Balla.
I pyetur nga gazetarët për të komentuar deklaratën e Bashës që ka thënë se Rama e ka kthyer PS-në në një stallë lopësh, Balla tha: “Ç’të them unë për Lulin, pyesni Lulin. Luli kur i referohet Partisë Socialiste duhet t’i referohet si një model i një partie që ka një organizim të pakrahasueshëm dhe që një parti që të gjithë anëtarët e PS i ka të disponueshëm për të gjithë anëtarët e PS. Nuk po hyjë në debatin që ka lindur brenda asaj partie që nuk dihet kush do votojë në 13 qershor”.
/b.h
