Partia Socialiste reagoi të mërkurën lidhur me dekretin e Presidentit të Republikës mbi “Caktimin e datës 11 shtator 2016, për zhvillimin e zgjedhjeve për Kryetar të Bashkisë Peshkopi, Qarku Dibër”, duke deklaruar se ky akt individual i Presidentit të Republikës ka dalë në mënyrë krejt të papritur dhe në kundërshtim me përcaktimet e kodit zgjedhor për caktimin e datës së zgjedhjeve të pjesshme vendore.
Përmes një deklarate për shtyp, deputetja e Partisë Socialiste, Blerina Gjylameti shprehet se “konkretisht vendimi për shkarkimin nga Këshilli i Ministrave për z. Xhelili është lënë në fuqi dje nga Gjykata Kushtetuese, por ende sipas saj, ky vendim nuk ka hyrë në fuqi. “Pra, vetëm pasi njoftohet për ekzistencën formale, hyrjen në fuqi të vendimit të Gjykatës Kushtetuese, i cili ka lënë në fuqi vendimin e Këshillit të Ministrave, vetëm atëherë Presidenti i Republikës bëhet kompetent të shpallë datën e zgjedhjeve dhe jo kur këtë e merr vesh përmes një njoftimi paraprak, i cili ka vetëm vlerë mediatike, por jo juridike”, thekson Gjylameti.
Duke vepruar në kundërshtim me procedurën e parashikuar nga Kushtetuta dhe Kodi Zgjedhor, PS vlerëson se akti administrativ individual Dekreti Nr.9716, datë 02.08.2016, i Presidentit të Republikës në kuptim të nenit 108 të “Kodit të Procedurave Administrative” është haptazi në kundërshtim me ligjin e për pasojë absolutisht i pavlefshëm.
Partia Socialiste konsideron të rëndësishme zhvillimin sa më parë të zgjedhjeve që garantojnë përfaqësimin sa më dinjitoz të qytetarëve të Dibrës në pushtetin lokal duke ju mundësuar njëherazi të gjithë hapësirën dhe kohën e nevojshme për të zgjedhur kryetarin e tyre. Procesi zgjedhor duhet të zhvillohet me një klimë besimi për të gjitha palët, duke lënë qytetarët të vendosin për përfaqësimin e tyre, por mbi të gjitha duke zbatuar përcaktimet e legjislacionit zgjedhor për caktimin e datës dhe organizimin e zgjedhjeve. Partia Socialiste si palë drejtpërdrejt e interesuar, në bazë të nenit 111 të “Kodit të Procedurave Administrative”, i kërkon Presidentit të Republikës të konstatojë pavlefshmërinë absolute të aktit administrativ sa më shpejt, në mënyrë që të mos shkaktohen pasoja të padëshiruara nga ligji.
