Partia Socialiste, sipas vendimit të komunikuar në mbledhjen më të fundit të Asamblesë së saj, ka urdhëruar 61 kryetarët e degëve të saj, sipas çdo bashkie, të dorëzojnë të gjitha detyrat e tyre shtetërore që kanë, për t’ju përkushtuar kësaj detyre partiake.
Ky model i ri që do të aplikohet nga PS parashikon që vetë partia të paguajë funksionarët e saj në krye të punëve për çdo bashki. Gjatë mbledhjes së fundit të kryesisë janë caktuar pagat për kryetarët e degëve.
Ato janë të ndara në kategori, sipas numrit të Zonave të Administrimit Zgjedhor që përmban bashkia në fjalë. Përjashtim bën bashkia Tiranë, e cila do të trajtohet në mënyrë specifike.
Pastaj bashkitë e tjera do të ndahen në tre kategori: me 3 ZAZ, me 2 dhe me 1. Burime për Shqiptarja.com bënë me dije se paga më e lartë do të jetë 1.2 milionë të vjetra, ndërsa për kategoritë e tjera do të jetë në rend zbritës tek më e vogla prej 620 mijë lekësh të vjetra. Partia Socialiste aplikon për herë të parë ndarjen e partisë nga pushteti publik.
Kriteret që duhet të përmbushin koordinatorët:
Të gjithë kandidatët e propozuar për Koordinator Elektoral, duhet të plotësojnë kushtet dhe kriteret si me poshtë:
a. Të mos jenë dënuar për kryerjen e një vepre penale dhe të mos jenë në hetim nga organet ligj-zbatuese;
b. Të kenë integritet të lartë moral dhe profesional si dhe të transmetojnë etikë në sjellje;
c. Të jetë figurë e njohur shoqërore në zonën përkatëse, të ketë njohje të mirë të komunitetit, (kulturës, njohjes së familjeve, fiseve, përkatësive fetare, etnike, etj.)
d. Të ketë aftësi komunikuese në transmetimin e bindjeve të tij;
e. Koordinatori elektoral, mund edhe të mos jetë anëtar i partisë;
f. Kandidati duhet të ketë aftësitë dhe mundësitë e nevojshme (përvojën, njohjen komunitare, kohën, mjetet materiale e financiare, etj.) për të përmbushur misionin;
g. Preferohet të mos jetë i punësuar në institucione publike;
h. Arsimi i lartë përveç Koordinatorëve Elektoral të QV-ve është i detyrueshëm.
ma.me
