Partia Socialiste ka vijuar edhe sot akuzat për kreun aktual të bashkisë së Tiranës Lulzim Basha për premtimet e e pa mbajtura gjatë mandatit të tij. Në një dalje për mediat deputetja e PS Olta Xhaçka tha se Basha jo vetëm që nuk ka mbajtur premtimet e bëra përpara qytetarëve, por nuk ka ditur të adminitrojë 6 milionë dollarë në vit.
Sipas deputetes së PS, Basha ka provuar këto 4 vite se ka lënë qytetin pas dore
“Lulzim Basha u duk për pak çaste në Tiranë. Por nuk gjeti një moment për të dhënë shpjegime për bilancin e dështuar të punës së tij. Erdhi dhe iku pa dhënë asnjë shpjegim për premtimet e pa mbajtura, për punët e pa bëra, për qytetin që e ka lënë të degradojë për 4 vjet. Në 2011 Luli premtoi se do të punonte për qytetarin. Një nga premtimet më të rëndësishme të tij ishte se do të hartonte një plan të qartë ndërhyrje për çdo lagje banimi për të rritur cilësinë e jetesës në çdo bllok. Këtë premtim as nuk e mbajti, e as pati ndërmend ta mbante ndonjëherë. Ndërhyrjet e Lulit përveçse gjysmake, numërohen me gishtat e njërës dorë. Dhe nuk mund të thotë as që e bllokoi qeveria sepse kjo situatë ka ardhur thjesht e vetëm si pasojë e paaftësisë dhe dembelizmit. Mjafton të shohësh sesi janë realizuar investimet e parashikuara nga vetë Luli në buxhetin e bashkisë për të kuptuar sesa e rëndë është situata dhe sa e madhe paaftësia. Investimet për shërbime publike vendore janë realizuar vetëm në masën 45.7%, ndërkohë që investimet për strehimin dhe planifikimin e territorit janë realizuar vetëm 17%! Në total, rreth 6 milionë dollarë në një vit që Luli nuk ka ditur t’i shpenzojë në të mirë të qytetarëve. Infrastruktura e Tiranës është sot shumë më keq sesa kur mori mandatin Luli. Pastrimi i lagjeve të Tiranës është sot më i keqi. Gjelbërimi nuk është shtuar e po kështu as këndet sportive e hapësirat rekreacionale. E vetmja gjë që u shtua në fakt janë ndërtesat e çibanët pa leje që Luli lejoi të mbinin në çdo cep të Tiranës. Në 21 qershor kjo situatë merr fund bashkë me ikjen e Lulit. Tirana ka sot nevojë për një kryetar bashkie që punon për qytetarët, për cilësinë e tyre të jetesës, për ta bërë qytetin funksional dhe të jetueshëm. Tirana ka sot nevojë të ecë në drejtimin e duhur.” tha Xhaçka
