Pas fjalëve të liderit demokrat Lulzim Basha në konventën e të rinjve demokratë, se me 8 dhjetor qeveria do të ikë nga pushteti, ka reaguar PS përmes deputetit socialist Alfred Peza. Deputeti tha se ngritja dhe trashja e zërit nga ana e kryeopozitarit nuk u bën më përshtypje askujt.
“Lulzim Basha mendon se duke trashur zërin do të fitojë pak më shumë mbështetje brenda radhëve të PD. Kjo është e vetmja arsye që pas humbjes së thellë në zgjedhje e 2013-ës dhe pas humbjes edhe më të thellë në zgjedhjet e 2015-ës, Basha kërkon revolucion. Kjo mazhorancë ka shumë për të bërë, vërtetë rritja ekonomike është dy herë më e lartë se kur qeveriste Partia Demokratike, por duhet edhe më shumë që shqiptarët të jetojnë edhe më mirë. Po luftojmë informalitetin, po vendosim rregull, po bëjmë shtet e po punojmë për reformën në drejtësi që për Shqipërinë të hapet një faqe e re”, tha deputeti i Partisë Socialiste, Alfred Peza.
Më pas ka reaguar Partia Demokratike përmes Grida Dumës, e cila tha se qeveria ka kfrikë nga marshimi i 8 dhjetorit.
“Sa më shumë afron 8 dhjetori, dita e bashkimit popullor kundër Edi Ramës dhe byrosë së hajdutëve, aq më shumë rritet ankthi dhe paniku i njeriut që raportet ndërkombëtare e kanë përcaktuar si pronarin e 200 milionë eurove, kryeministrin më të pasur të vendit më të varfër në Europë. Ankthi i tij buron nga fakti se me 8 dhjetor në shesh nuk do të mblidhet vetëm opozita, por një popull mbarë i shtypur, i dhunuar nga keqqeverisja nga korrupsioni, nga krimi i ngritur në pushtet nga padrejtësia. Koha e Edi Ramës, bandës së tij prej 40 hajdutëve ka marrë fund.
