Ka bërë buëj dhe po diskutohet gjerësisht kapja e 137 kilogramëve kokainë në portin e Durrësit. Droga ishte vendosur në kontenierët dhe ka qenë bashkëpunimi i DEA-s amerikane me Greqinë dhe Shqipërinë që solli edhe sekuestrimin e saj. Pikërisht kjo ngjarje ishte një nga temat ‘pikante’ që emisioni “Java në RTSH” diskutoi të premten në mbrëmje.
Duke folur për rastin në fjalë, analisti Lorenc Vangjeli provokoi duke u shprehur se: “Lufta kundër drogës, në mënyrën sesi është konceptuar në Tiranë, më ngjan se përgjithësisht është e gabuar”.
“Ky është një problem të cilin nuk e zgjidh dot as çizmja e policit dhe as koburja e tij. Këtë e zgjidh lapsi i ekonomistit” – tha Vangjeli.
Ai shtoi se në fund fare, qëllimi i çdo veprimtarie kriminale është sigurimi i të mirave materiale dhe pastrimi i parave të përfituara nëpërmjet investimit.
“Vetëm bllokimi i trafikut nuk mjaft. Sa më i madh të jetë presioni i shtetit, po aq i madh do të jetë edhe presioni i trafikantëve. Ajo çfarë është shumë më lehtë të bëhet në Tiranë është identifikimi i të mirave që vijnë nga aktiviteti kriminal. Mjafton të shihet stili i jetesës së disa njerëzve që nuk kanë punuar një ditë të vetme, për t’i identifikuar rastet” – tha Lorenc Vangjeli në studion e emisionit “Java në RTSH.
/javanews/a.r
