Rudi Vata, ish-kapiteni i Kombëtares, në një lidhje direkte me studion e “Ditarit” në A2 CNN, komentoi grupin kualifikues të Shqipërisë, ku do të përballet me Anglinë, Serbinë, Letoninë dhe Andorrën.
“Short interesant. Nëse duam të rritemi si Kombëtare, duhet të luajmë me kundërshtarë të tillë, që janë të rëndësishëm në futbollin botëror. Duhet të jemi kompaktë si grup që t’ia dalim”, tha Vata.
Sipas ish-kapitenit të Kombëtares, të luash në Wembley është presion i mirë.
“Sigurisht që në të kaluarën kemi pasur rezultate jo të mira, por tani jemi më të pjekur. Mundësitë i kemi për të bërë shumë më mirë. Anglia dhe Serbia janë dy skuadra që për mendimin tim do të luftojnë për vendin e parë, ndërsa Shqipëria për vendin e dytë ose të tretë. Serbia ka eksperiencë të madhe, kanë lojtarë që kanë luajtur vazhdimisht në nivele të larta. Për neve do të jetë eksperiencë dhe duke luajtur me kundërshtarë të tillë, bëhesh më i fortë. Jemi në fazën e rritjes, jemi në fazën e një hapi tjetër të futbollit. Nuk do e shikoja si katastrofë nëse nuk kualifikohemi në Botëror, do e shikoja si eksperiencë për të ardhmen”, shpjegoi Rudi Vata.
Në lidhje me incidente të mundshme në ndeshjen ndaj Serbisë, Vata theksoi: “Sigurisht që provokimet do të ekzistojnë, është luftë ndjenjash, por lufta fitohet me qetësi dhe dituri. Futbolli luhet në fushë dhe kush është më i zoti, fiton. Nëse duam të fitojmë në aspekte të tjera që nuk kanë lidhje me futbollin, atëherë do të thotë që po e përgatisim keq. Situata si ajo e para 10 viteve nuk i shërben as Serbisë dhe as neve”.
