Maturantët që synojnë të veshin bluzën e bardhë do t’i nënshtrohen edhe këtë vit konkursit të pranimit në programin e Mjekësisë.
Nga 17 deri më 21 gusht, kandidatët që e kanë përzgjedhur Mjekësinë si një nga preferencat e tyre do të zhvillojnë provimin e informatizuar, i cili konsiderohet një nga etapat më të rëndësishme në garën për t’u bërë pjesë e Universitetit të Mjekësisë.
Provimi do të zgjasë 60 minuta dhe do të përmbajë 50 pyetje, të përzgjedhura nga fondi prej rreth 3 mijë pyetjesh, ku përfshihen edhe pyetje me nivel të lartë vështirësie.
Testimi do të zhvillohet perpara kompjuterit, në katër fasha orare, ndërsa në çdo sallë do të jenë të pranishëm deri në 60 maturantë. I gjithë procesi do të monitorohet me kamera, me synim garantimin e transparencës dhe integritetit të konkursit.Lista me emrat e kandidatëve dhe oraret e testimit do të publikohet 2 deri në 3 ditë përpara nisjes së provimit.
Për t’u bërë pjesë e konkursit, kandidatët duhet të kenë përzgjedhur programin e Mjekësisë si një nga 10 preferencat e tyre dhe, gjatë periudhës 6–10 gusht, të shkarkojnë nga portali e-Albania faturën e aplikimit, ta likuidojnë atë pranë Postës Shqiptare ose një banke të nivelit të dytë dhe më pas të konfirmojnë pagesën në sistem.
Rezultati përfundimtar do të llogaritet duke kombinuar 30 për qind të pikëve të konkursit me 70 për qind të mesatares së arsimit të mesëm.
Kandidatët fitues pritet të shpallen në fund të muajit gusht.
Ashtu si edhe vitin e kaluar, studentët që do të pranohen në programin e Mjekësisë do të nënshkruajnë kontratën që i detyron të ushtrojnë profesionin për tre vite në Shqipëri pas përfundimit të studimeve.
