Prej më shumë se 10 vitesh, Meleqe Dukës, i është dashur të jetojë me dhimbjen dhe mundimin që shkaktonte pengesa për të ecur normalisht si gjithë të tjerët, pasi këmba e saj e djathtë ishte e sëmurë.
E sikur të mos mjaftonte vuajtja fizike dhe shpirtërore për 53-vjeçaren, problemeve të saj dhe familjes të vendosur së fundi në rrethinat e Shkozës, Tiranë, i shtohej edhe pamundësia ekonomike për të përballuar blerjen e protezës dhe ndërhyrjes së domosdoshme kirurgjikale për t’u shëruar.
Por sot, për Meleqen është një ditë e veçantë. Më në fund, ajo mund të ecë normalisht, si gjithë të tjerët!
Pas ndërhyrjes së sukseshme kirurgjikale në Spitalin Universitar të Traumës për vendosjen e protezës ortopedike falas, Meleqja i është rikthyer jetës normale dhe thotë se është gati për t’u rikthyer në vendin e saj të punës.
Investimi i qeverisë me vlerë rreth 1 milionë dollarë, bëri të mundur që ajo, por edhe shumë pacientë të tjerë, të mund të operohen dhe të marrin falas protezën ortopedike, e cila deri pak muaj më parë ishte një barrë e papërballueshme për familjen e saj por edhe për shumë qytetarë të tjerë.
Deri më sot pacientët që kishin nevojë për proteza, ishin të detyruar që t’i paguanin vetë ato me një çmim dy herë me të lartë sesa ai që shpenzohet aktualisht nga buxheti i shtetit për blerjen e tyre. Ndërsa tani protezat, përveçse cilësore dhe të garantuara, për pacientët, do t’u kursejnë buxheteve të tyre familjare rreth 2 milionë dollarë në vit.
Protezat ortopedike, janë një tjetër provë konkrete e ndryshimeve rrënjësore që janë ndërmarrë në sistemin shëndetësor gjatë këtyre tre viteve./a.m.
