Krerët e vendit kanë nisur aktivitetet shtetërore për shënimin e 18-vjetorit të Pavarësisë së Kosovës. Pas ngritjes së Flamurit, krerët e vendit thanë se pavarësia e Kosovës është arritur me sakrifica të mëdha.
Presidentja e vendit, Vjosa Osmani, teksa ka përkujtuar të gjithë ata që sakrifikuan gjithçka në mënyrë qytetarët të gëzojnë sot shtetin e Kosovës, theksoi se sakrifica për të arritur deri këtu ka qenë shekullore.
“Shprehim respektin më të thellë për rrugën, vizionin dhe kontributin e presidentit tonë historik, Atit të Pavarësisë dhe arkitektit të saj, doktor Ibrahim Rugova. Për sakrificën e familjes Jashari, në krye me komandantin legjendar Adem Jashari. Për mijëra dëshmorë e heronj të Ushtrisë Çlirimtare të Kosovës”, tha ajo.
Kryetarja e Kuvendit të Kosovës, Albulena Haxhiu, ka nderuar figurat e larta që kontribuuan për çlirimin, lirinë dhe pavarësinë e Republikës së Kosovës.
“Po ashtu, sot nderojmë edhe figurat e larta që kontribuan, në rrethana dhe periudha të ndryshme, për çlirimin, lirinë dhe pavarësinë e Republikës së Kosovës. Pavarësinë e nderojmë duke punuar me institucione funksionale, që veprojnë me integritet dhe profesionalizëm”, tha ajo.
Nga ana e tij, Kryeministri Albin Kurti theksoi se gjatë viteve të pavarësisë është rritur numri i njohjeve të shtetësisë, është zhvilluar ekonomia e vendit, është rritur mirëqenia e qytetarëve dhe është forcuar fuqia e shtetit. Kurti tha se shteti është ndërtuar falë sakrificës së shumë brezave.
Sipas tij, para tetëmbëdhjetë vitesh lindi pavarësia e Republikës së Kosovës, e cila u arrit falë shumë brezave veprimtarësh, ndër breza të panumërt të popullit tonë, që kontribuuan dhe u sakrifikuan që ne sot të jemi të lirë e të pavarur, me një shtet demokratik dhe sovran.
“Sot festojmë, por njëkohësisht nderojmë edhe rezistencën paqësore dhe kryengritjet e armatosura, të cilat kulmuan me luftën e drejtë të Ushtrisë Çlirimtare të Kosovës”, tha ai.
Ai përmendi njohjet ndërkombëtare, që tani numërojnë 121 vende, konsolidimin e institucioneve demokratike dhe sundimin e ligjit; ndërtimin e një ekonomie të qëndrueshme dhe në rritje; forcimin e ushtrisë dhe kapaciteteve mbrojtëse; sukseset ndërkombëtare në sport, art dhe kulturë; dhe pjesëmarrjen aktive në forume botërore.
Kurti foli gjithashtu për lëvizjen e lirë pa viza dhe hapat konkret drejt integrimeve evropiane, përfshirë aplikimin në Bashkimin Evropian dhe në Këshillin e Evropës, duke i cilësuar si arritje që na bëjnë krenarë të gjithë.
Ai tha se përforcimi dhe zhvillimi i shtetit tonë kërkon angazhim të përbashkët me punë, dije dhe integritet.
