Të rinjtë e Partisë Demokratike kanë mbushur bulevardin me 10 kartona me fytyrën e personazheve të njohura. Protestuesit e kanë veshur në mënyrë simbolike kryeministrin Edi Rama me uniformën e të burgosurit. Manekinet si të burgosur janë disa, figurat më të njohura të krimit dhe trafikut te drogës në Shqipëri si Emiljano Shullazi, Lul Berisha, Kelmend Balili, Moisi Habilaj, si dhe politikanë si Edi Rama dhe Saimir Tahiri. Protestuesit kanë lëshuar thirrjet “Burg, burg” me kartonët të vendosur para tyre. Një nga sloganët kryesorë të protestës së opozitës është “Banditët në burg, jo nëqeveri”.
Targat e makinës “Audi” të Tahirit
Protestuesit e opozitës duket se e kanë nisur aksionin e tyre që në fillim të udhëtimit. Mësohet se protestuesit që po vijnë nga qytete të ndryshme në Tiranë mbajnë me vete më automjetet e tyre targën e automjetit shtetëror të ish-ministrit të Brendshëm Saimir Tahiri AA 003 GB duke i shtuar edhe epitetin “i paprekshëm”.
Targa e makinës “Audi” të Tahirit, AA 003 GB doli nga përgjimet e bandës së Habilajve, një ndër bandat e krimit të organizuar. Makina shtetërore me këtë targë ishte pronë e Saimir Tahirit dhe dyshohet se përdorej nga banda e Habiljave për lehtësimin e trafikut ndërkombëtar të kanabisit. Sipas PD, protestuesit e mbajnë targën AA 003 GB me mbishkrimet “narkoshteti” dhe “të paprekshëm” për të treguar se kanabizimi i Shqipërisë ishte projekt politik i Edi Ramës, i cili vazhdon të jetë përfituesi kryesor i trafikut ndërkombëtar të drogës dhe mbrojtësi i tyre nga drejtësia.
Përdorimi i makinës së Ministrit të Brendshëm me targën AA 003 GB nga banda e Habilajve u denoncua nga oficeri Dritan Zagani në tetor 2015.
