Ish kryeministri Sali Berisha e ka cilësuar protestën e 3 marsit si një revolucion të fuqishëm të demokratëve ndaj një “kufome politike”, duke iu referuar kreut të qeverisë Edi Rama.
Ai u shpreh gjatë një takimi me demokratët e Tiranës, se Rama po bën përpjekjet e fundit armiqësore ndaj Partisë Demokratike në gjykatë, por paralajmëroi se faturat e këtij veprimi do i paguajë vetë.
“Ne do t’i qëndrojmë atij. 3 Marsi është një ditë e veçantë ku do të flasim fuqishëm në protestën tonë, revolucionin tonë. Kufomë politike e pakallur. Sot ai përbën rrezikun më të madh për këtë vend. Është i gatshëm të marrë çdo vendim që të shpëtojë lëkurën e tij. Ai e di që me korruptimin e McGonigal, me thikën e tmerrshme që i futi marrëdhënieve shqiptaro amerikane, ai nuk mund të ketë më shpresë për të ardhme politike. Do bëjë gjithçka të marrë çdo vendim.
Do mbajë çdo qëndrim në mënyrë që të mund të mbijetojë. Dhe ne i themi atij që edhe ne do marrim çdo vendim në mënyrë që të shporrim nga skena politike. Një kufomë politike nuk mbahet kurrë në pushtet. Shoqëria dhe vendi duhet të shpëtojnë një minutë e më parë prej tij. Ai na fton ne për qëndrime për të cilat do të paguajë çmimin më të madh. Po bën ndërhyrjet e fundit armiqësore ndaj Partisë Demokratike në gjykatë.
Unë i them se absolutisht ndaj çdo vendimit tënd, faturën do e paguash vetëm ti si krim ministër. Vetëm qeveria jote. Ne nuk shuhemi. Jemi forcë politike e pamposhtur. Ne e faktuam këtë. Dështoi çdo plan për të na shndërruar në vasale të Partisë Socialiste. Çdo plan për të na emëruar kryetarin e partisë. Për të na mbajtur një krye të partisë një njeri që vetë e kishte akuzuar ishte i financuar nga rusët.
Mos mendoni se McGonigal ishte një person i izoluar. Ai nuk ishte i vetëm. Kishte disa bashkëpunëtorë. Ndaj dhe ne duke nxjerrë çdo mësim duhet të ecim në këtë revolucion me bindjen se Shqipëria bëhet vetëm nga shqiptarët. Me bindjen se liria që ne mbrojtëm dhe mbrojmë është forcë e pathyeshme. Se orientimi unë perëndimor, nuk mund të ndryshojë me asgjë. I rezistuam një agresioni korruptiv të pashembullt por jemi në këmbë dhe ecim të sigurt deri në përmbysjen e Edi Ramës dhe regjimit të tij”, deklaroi Berisha.
Sali Berisha ka vijuar sërish sulmet kundër drejtësisë duke e etiketuar si segment të Partisë Socialiste.
‘Edi Rama dhe kjo qeveri duhet të largohen sa më parë. Ata kontrollojnë sot të gjitha pushtetet kanë shndërruar drejtësinë në degë të PS-së, një drejtori të ekzekutivit të saj. Asnjë shqiptar nuk pret më që e drejta e tij ti sanksionohet në një proces gjyqësor kur ai kërkon. Së pari do ti duhen 10-15 vite për tu gjykuar, duhet të paguajë qimet e kokës ryshfet për të afruar vendimin dhe pastaj aty fiton ai që paguan më shumë.
Gjykata Kushtetuese para kësaj, nuk është se nuk kishte të meta e defekte, por tre mandate të qeveritarëve të lartë që kishin përdorur pushtetin për tu pasuruar vetë, ua hoqi pa koment, duke patur edhe funksione e lidhje të forta, por diktimi i Kushtetutës ishte i atillë që nuk lejonte vendim tjetër.
Kurse kjo gjykatë, duke shkelmuar mbi të gjithë precedentët, mbi veten e saj dhe Kushtetutën refuzoi të heqë mandatin e Olta Xhaçkës. Një ministre që bëhet vetë dhe kunatën investitor strategjik, por që mbrohet për korrupsionin e saj nga Edi Rama dhe Gjykata Kushtetuese.
‘Hakmarrja për drejtësi’ ka vrarë 17 shqiptarë të dokumentuara, të faktuara, ka 29 grabitje me armë. Sot ata u shpallën të pafajshëm nga gjykatat e kontrolluara nga Edi Rama.’- tha Berisha./m.j
