Kryetari i Partisë së Lirisë, Ilir Meta, i ftuar në emisionin “Log” në Abcnews ka folur për aksionin opozitar, dhe për protestën e paralajmëruar për javën e ardhshme tek inceneratori i Tiranës.
I pyetur se përse do të nisë protesta nga inceneratori i Tiranës, Meta tha se ka ardhur koha e përshkalëzimit dhe që lufta kundër korrupsionit të bëhet tani aty ku ndodh krimi dhe jo vetëm me denoncime në SPAK. Ai theksoi se rruga e vetme e rikthimit të shtetit ligjor është aktivizimi qytetar.
Meta deklaroi gjithashtu se deri dje LSI dhe sot Partia e Lirisë kanë dhënë një kontribut të jashtëzakonshëm duke depozituar fakte dhe prova në SPAK për shkeljet që kanë ndodhur, tani është koha që politika të denoncojë nga terreni.
Pjesë nga biseda:
Keni qenë me disa nga figurat e partisë në Shijak, kemi parë një denoncim tuaj për një problematikë ekologjike. Në daljen për shtyp njoftuar se protesta e radhës do të jetë tek inceneratori i Tiranës?
Këto e kanë një lidhje sepse pati një koincidencë se të dyja si biznes punojnë me logjikën e mafies. Unë kam pasur shumë mesazhe nga banorët e Shijakut të cilët thanë se atje po bëhet nami. Më dërgonin pirgje me plehra. Ajo që ka ndodhur është shumë e rëndë, ka qenë e programuar, tërë natën atje ka pasur një djegie masive që është ndier deri në Golem e në plazh e kështu me radhë, është shumë e rëndë ka qenë e qëllimshme. Qytetarët paguajnë taksat e pastrimit, bashkia i jep kompanisë punën, ajo i depoziton pranë fshatrave dhe i djeg natën, që është me pasoja shumë të rënda për gjithë komunitetin, pasojat janë të gjithanshme.
Në të njëjtën mënyrë funksionon edhe afera e inceneratorëve në Tiranë, është e njëjta logjikë, nuk ka inceneratorë dhe lekët shkojnë në Holandë. Është një problem që nuk është vetëm i Shijakut, por situata ishte akoma më e rëndë, deklarata e policisë, që thoshte shoh se është një fshatar që ka djegur gomat, ndërkohë që aty ato kanë qenë të depozituara qëllimisht. Kjo tregon se ka një kapje të qartë të shtetit. Duhet të kishte një reagim nga ana e qeverisë apo institucioneve të tjera. Është vërtetë një dramë e madhe në këto lloj aktivitetesh. Në vend që tu përgjigjen qytetarëve për taksat, por i helmojnë. Kryetari i Bashkisë ka gënjyer duke thënë se këto po i bëjmë falas.
Pse protesta te inceneratori i Tiranës?
Meta: Ne kemi thënë se nuk do të protestojmë vetëm me fakte, ne kemi denoncuar vazhdimisht. Sot PL e dje LSI ka dhënë një kontribut të jashtëzakonshëm duke depozituar fakte të tëra në SPAK. Por ky aktivitet kriminal vazhdon, është momenti i përshkallëzimit, dhe ne kemi thënë që do të jemi në vendngjarje aty ku ndodh krimi, vjedhja, falsifikimi. Ky është një moment tjetër në luftën antikorrupsion.
/e.d
