Shinasi Rama, një nga liderët e Lëvizjes të 8 dhjetorit 1990, ndjen se politika e sotme, që ai e quan “paria e Tiranës” ka dështuar për ta çuar vendin drejt asaj të ardhmeje që studentët u ngritën në këmbë 25 vjet më parë. Profesor doktor Shinasi Rama tha se protesta që opozita do të mbajë më 8 dhjetor, ditën simbol të rënies së komunizmit, është demagogjike dhe nuk ka lidhje me idealet që ngjallën revoltën e fortë të studentëve.
I ftuar në studion e Report TV së bashku me doktoreshë Vlabona Karanxha, Shinasi Rama tha se nuk do të jenë në protestën e 8 dhjetorit që lideri i opozitës Basha nuk e sheh vetëm si marshimin e radhës kundër qeverisë në atë që e quan “8 dhjetori i dytë”, por edhe si mundësi për ta çuar vendin drejt zgjedhjeve të parakohshme.
“Nuk jemi pjesë e protestës sepse nuk ka të bëjë me protestën tonë. Këta njerëz po ngrihen në protesta se po kërkojnë që të bëjnë zhurmë, të krijojnë presione për një qeveri. Paria e Tiranës është e ndarë në dy pjesë, ditën e natën punojnë bashkë por për interesa të tyre duhet të shiten sikur janë kundërshtarë të njëri-tjetrit. Janë bandë kriminale mafioze e njerëzve që kanë interes pasurimin e tyre, dhe në anën tjetër është populli që kërkon zgjidhje. Çfarë protestash popullore janë këto, këto janë tallje me qytetarët. Çohen njerëz që luftojnë të korruptuar mes njëri-tjetrit”, -u shpreh ish-dhjetoristi Rama
Zoti Rama thotë se politika nuk është i ftuar në aktivitet që do të mbahen në përkujtim të 25-vjetorit të rënies së komunizmit. Ai e ka një përgjigje se përse politika, qoftë edhe presidenti nuk e kanë ftuar:
“Nuk jam i ftuar por ajo që është e rëndësishme për ne është se sado të mundohen palët e parisë, nuk mund të marrin 8 dhjetorin tonë, në atë periudhë kritike të mbushur me arritje ajo është pjesë e historisë së shqiptarëve. Pavarësisht vullnetit të tyre për të marrë rolin e protagonistëve apo për të na zëvendësuar ne me marionetat e tyre nuk ka kurrfarë vlere. Njerëz si puna ime që ja kemi thënë në sy që këta do të jenë shkatërrimtarët e vendit, dhe jemi shkëputur nga opozita për të mos qenë pjesë e krimit, çfarë të na ftojnë ata? Sot kemi një vend të korruptuar, ne po japim të njëjtin mesazh si atëherë. Si do të rrinë ata përballë nesh, do na tregojnë Gërdecin, skllavërimin e shqiptarëve, vajzat tona që përdhunohen e shiten rrugëve të botës? Çfarë do të na tregojnë tulla llac e ndërtesa. Ata kanë dhunuar njeriun”, – u shpreh Shinasi Rama.
Por edhe pse prej vitesh në Shtetet e Bashkuara të Amerikës ku kanë ndërtuar një jetë dinjitoze, si Shinasi Rama dhe doktoresha Valbona Karanxha thonë se janë të gatshëm të kthehen në Shqipëri për të dhënë kontributin e tyre nëse vendi do t’ua kërkonte.
“Unë jam shqiptar, kam shkuar si i mërguar politik në SHBA, kam ndërtuar një jetë dinjitozë, por do të kthehesha në Tiranë për të ndryshuar Shqipërinë. Çdo veprim e bëjmë së e duam këtë vend, edhe po të duam të ikim ne nga ky vend nuk ikën ky vend prej nesh”, – u shpreh Shinasi Rama.
Por si i kujtojnë dy protagonistët e Lëvizjes së Dhjetorit protestat e studentëve në vitin 1990?
Shenasi Rama: Ato vite kanë qenë vite të shpresës së madhe për shqiptarët, të një ëndrre romantike që edhe ne do të bëheshim si gjithë të tjerët. E kujtoj si një periudhë të madhe të entuziazmit, si periudhë ku forcat më të errëta të shtetit mund të bënin veprime jo të këndshme. E kujtoj si një moment ku ne studentët ishim në gjendje të ngjallnim shpresën për të gjithë. Respektoj kontributin e Lëvizjes Studentore, ndërtimin e opozitës dhe kthimin e shpresës në të ardhmen tek të gjithë shtresat e popullit shqiptar.
Valbona Karanxha: Janë bërë arritje të mëdha, shoqëria ka ndryshuar dhe kjo ishte një ndër rëndësitë e Lëvizjes që elektrizoi masat dhe i rriti besimin popullit që të flasë lirshëm.
Këtë të hënë me një pjesëmarrje të lartë intelektualësh mbajtën një bashkëbisedim Publik për Tranzicionin dhe Ndërtimin e “Rrethit te Ferrit”, një titull simbolik për klasën politike shqiptare.
