Ministrja e Shëndetësisë, Klodiana Spahiu, ka njoftuar zyrtarisht prezantimin e Suela Popës në pozicionin e drejtoreshës së re të Fondit të Sigurimit të Detyrueshëm të Kujdesit Shëndetësor (FSDKSH). Njoftimi u bë publik përmes një mesazhi të shpërndarë nga vetë ministrja në rrjetet sociale.
Në deklaratën e saj, drejtuesja e dikasterit të Shëndetësisë vuri theksin te pesha administrative dhe përgjegjësia që mban ky institucion kyç në mbarëvajtjen e shërbimeve mjekësore në vend.
“FSDKSH ka një rol të rëndësishëm në funksionimin e sistemit shëndetësor, ndaj drejtimi i saj kërkon eficencë, përgjegjshmëri dhe një vëmendje të vazhdueshme te mënyra se si fondet publike kthehen në shërbime më të mira për qytetarët.”, tha ministrja.
Ministrja Spahiu nënvizoi se nën drejtimin e ri, fokusi do të jetë te rritja e efikasitetit në përdorimin e fondeve publike dhe thellimi i bashkëpunimit me të gjithë aktorët e sistemit spitalor e shëndetësor.
Përmes mesazhit të saj, ministrja shprehu gjithashtu mirënjohjen për punën e kryer nga drejtuesi i deritanishëm i institucionit, Ilir Topi, duke i uruar njëkohësisht sukses drejtueses së re në detyrën e marrë përsipër.
“Me Suela Popën do të punojmë për të forcuar këtë qasje dhe për të rritur bashkëpunimin me të gjithë aktorët e sistemit. Falënderoj Ilir Topin për kontributin e tij në drejtimin e FSDKSH dhe i uroj Suela Popës shumë suksese në këtë përgjegjësi të re!”, theksoi Spahiu.
