Kryeministri Edi Rama ka postuar një reagim të tij në rrjetin social në lidhje me protestën që u zhvillua përpara Kryeministrisë nga ana e maturantëve.
Në reagim Rama shkruan se të parët që zgjedhin degën janë më të mirët, duke shtuar se deri më 20 shtator, çdo fitues në më shumë se një degë do të regjistrohet në degën e vetme që do të ndjekë, dhe automatikisht vendet e zëna në listë, do të lirohen për shpalljen e fituesëve të tjerë.
Ja çfarë shkruan Rama në Facebook:
NJË SQARIM ME ZËRIN E MATURANTËVE
Një nga risitë e Reformës në Arsim është më të mirët zgjedhin të parët!
Po sigurisht, një maturant i shkëlqyer nuk mund të shkojë në tetë, nëntë apo dhjetë degë, ku shpreh fillimisht preferencën dhe del fitues!
Deri në 20 shtator, çdo fitues në më shumë se një degë, do të regjistrohet në degën e vetme që do ndjekë dhe, automatikisht, të gjitha vendet e tjera që ka zënë përkohësisht në listën fituese, do të lirohen për shpalljen e fituesve të tjerë.
Pra, e drejta për të zgjedhur përcaktohet sipas meritës, me procedura transparente, jo më në errësirë sipas tarafit apo parasë… Rregullat janë të qarta dhe kush ndjek si duhet procedurat, padiskutim do të ushtrojë të drejtën e vet për shkollim të lartë, sipas meritës.
Suksese dhe mos harroni: Janë 25 mijë kuota për 27 mijë e 600 aplikues, kështu që ata që do mbeten jashtë në fund të procesit, do të jenë një numër i kufizuar e me rezultatet më të dobëta ndër gjithë të tjerët. Prandaj respekt për meritën e secilit dhe durim deri në përfundimin e procesit!
Më poshtë Kryeministri Rama ka publikuar dhe një VIDEO ku sqarohet përmes zërit të disa maturantëve procesi që ai shpjegon./ /java/a.k
