Opozita do të zhvillojë të hënën një protestë një orëshe, nga ora 11.00 deri në 12.00, duke bllokuar trafikun kombëtar. Kreu i PD-së, Lulzim Basha tha nga çadra se do të jetë një sakrificë e vogël, por një dhuratë e madhe për Shqipërinë e Re.
“Çdo shqiptar është i thirrur të bashkohet. Një orë bllokim i trafikut kombëtar është një sakrificë e vogël dhe një dhuratë e madhe për Shqipërinë e re, për të bllokuar trafikun e drogës, të krimit, për të siguruar liritë themelore të qytetarëve që do të jenë garancia e mirëqënies së qytetarëve. Mos harroni nesër një orë të gjithë bashkë të vendosur dhe paqësor. Bashkohemi të bllokojmë të keqen me këtë paralajmërim për t’i hapur rrugë të mirës për çdo shqiptar duke larguar e mundur drogën, krimin, qytetarëve, të drejtën për të zgjedhur me votë të lirë dhe të ndershme”, tha Basha.
Kryetari i Partisë Demokratike tha sot gjatë fjalimit në çadrën e protestës së opozitës senë grykëderdhjen e Ishmit ka ngecur një skaf i ngarkuar me drogë. Sipas kryetarit të PD, mjeti lundrues është i Habilajve, ndërsa akuzoi policinë dhe mediat se nuk guxojnë t’i afrohen.
Kreu i PD-së, Lulzim Basha akuzoi Linda Ramën, bashkëshorten e kryeministrit Edi Rama, se është në krye të një komploti ekonomik në vend. Sipas tij, ajo suporton fuqimisht një bankë në vend, e cila ka në përbërje dy investitorë rusë të pasurive të patundshme.
Kryetari demokrat Basha theksoi sërish ndryshimin e Kushtetutës për zgjedhjen e Presidentit nga populli. Ai solli në vëmendje kompromisin e 2007-ës mes mazhorancës dhe opozitës.
“Kanë 48 orë që nuk përgjigjen për ofertën tonë për President nga populli. Kishin nxjerrë të gjorin Gramoz për të thënë që nuk e zgjedhim dot Presidentin nga populli se nuk ka kohë dhe nuk ndryshojmë dot Kushtetutën. Kohë për të vjedhur kanë, por për të ndryshuar kushtetutën, nuk kanë. Para 10 vitesh Rama kërcënoi se nuk do hynte në zgjedhje nëse nuk ndryshohej kushtetuta dhe ligji që çdo votues të kishte me vete certifikatën e lindjes. U ndryshua kushtetuta, iu dha kjo garanci”, u shpreh Basha
c.a
