Bashkia e Tiranës ka miratuar një mundësi të re për familjet dhe çiftet e reja, duke ofruar kredi të buta për blerjen e një banese. Për vitin 2026, janë alokuar 1500 kuota të reja, ku qytetarët mund të përfitojnë nga subvencionet për normat e interesit të kredisë. Ky program është i dedikuar për ata që nuk kanë mundësi të përballojnë normat e tregut për të blerë një shtëpi.
Drejtori i Drejtorisë së Mbrojtjes Civile, Dritan Dango, tregon se aplikimi për këtë program realizohet përmes portalit e-Albania, ku algoritmi kontrollon të dhënat financiare dhe skualifikon aplikuesit që nuk plotësojnë kriteret.
“Nga 1100 fitues që kanë qenë një vit më parë, këtë vit numri ka shkuar në 1500. Ndoshta me buxhetin që ne kemi, do të arrijmë të rrisim edhe më shumë numrin e përfituesve që të fitojnë nga programi për kreditë e buta. Kreditë do të ndahen në tre faza, sikurse ka qenë edhe më parë. Ajo që është bërë më mirë dhe themi që është përmirësuar më shumë këtë vit është faza e parë, e cila tashmë i lejon qytetarët të mos shkojnë tek njësia administrative për të dorëzuar dokumentat, por të aplikojnë përmes e-Albania.”
Pas fazës së parë, ata që kalojnë duhet të dorëzojnë dokumente shtesë dhe të plotësojnë formularët në bashkëpunim me bankat. Programi fokusohet kryesisht tek familjet që nuk kanë një banesë në pronësi ose që jetojnë në kushte të pasigurta.
“Patjetër që 2026 do të ketë një numër shumë më të madh aplikuesish. Të gjithë janë qytetarë që kanë gjendjen e tyre civile në Tiranë. Seleksionimi më pas bëhet në bazë të kritereve.”
Si prioritare konsiderohen gratë e veja, gratë nga komuniteti rom dhe egjiptian.
Kjo mundësi ofron një shans të madh për rritjen e aksesit në pronësi, ul barrën financiare dhe mbështet stabilitetin social.
