Mbrëmja e dytë gjysmëfinale e “Këngës Magjike” ka sjellë një surprizë të jashtëzakonshme për Marsidën, një vajzë e re nga Pogradeci, e cila propozimin për martesë nga i dashuri i saj e ka marrë live në skenën e festivalit. Rubrika “Një mesazh për ty” nga e “E diela shqiptare”, mbrëmë u zhvendos në Pallatin e Kongreseve, duke emocionuar publikun në sallë, por edhe atë nga shtëpia.
Luli, një djalosh nga Puka, i kishte përgatitur një surprizë së dashurës së tij, Marsit, e cila u bë pjesë e “një kurthi” të ngritur nga organizatorët e KM.
Marsida, e pranishme në KM me të motrën e Lulit, për një moment ka dalë jashtë sallës së festivalit, me justifikimin se kjo e fundit nuk ndihej mirë. Ky ka qenë momenti kur Arditi ka shfrytëzuar rastin për të pyetur Lulin për njohjen e dy të rinjve. Marsida, siç tha ai, i kishte pëlqyer qysh herën e parë që e kishte parë në lokalin ku ishte menaxher. Kishte bërë shumë sakrifica dhe rrugë të gjatë derisa ia kishte arritur qëllimit. Fillimisht, tregoi ai, familja e vajzës nuk ishin dakord për këtë lidhje, por vendosmëria e dy të rinjve i kishte kaluar të gjitha barrierat.
Pas kësaj, Arditi kërkon që Marsida të ngjitet në skenë. E habitur, ajo vjen në skenë, por pas saj është edhe koreografja e trupës së baletit të Këngës Magjike. Edhe pse Arditi e sajoi si një “ngatërresë”, i tha Marsidës të qëndronte aty duke i bërë edhe disa pyetje, duke përfshirë edhe “Si e ke imagjinuar propozimin për martesë?” Në atë kohë, në skenë shfaqet Luli, i cili i propozon Marsit duke u ulur në gjunjë: “A do të martohesh me mua?” Pas kësaj surprize, e cila e ka mallëngjyer dhe e ka lënë pa fjalë, Marsida nuk kishte zgjidhje tjetër: “Jam shumë e lumtur. Po, pranoj!’,- tha ajo.
