Biznesmeni italian, Francesco Becchetti, i akuzuar për pastrim parash dhe falsifikim dokumentesh, ka ngritur një padi kundër qeverisë shqiptare në gjykatën e Strasburgut, në të cilën pretendon se deklaratat publike të kryeministrit Edi Rama kanë shkelur prezumimin e tij të pafajësisë, shkruan Shekulli.
Padia e ngritur nga Becchetti është depozituar në Gjykatën Evropiane për të Drejtat e Njeriut në Strasburg më 21 tetor 2015 dhe i është komunikuar qeverisë shqiptare më 12 janar. Padia i referohet një serie deklaratash publike të bëra nga kryeministri Edi Rama në media dhe rrjete sociale në qershor 2015 në lidhje me çështjen penale të ngritur në Tiranë kundër biznesmenit italian.
Nga deklaratat e Ramës mbi procedimin penal të ngritur nga Prokuroria e Tiranës, padia e Beketit në GJNED veçon një postim të kryeministrit në “Twitter” më 9 qershor, si dhe tri intervista të mëvonshme televizive në “Vizion Plus”, “A1 Report” dhe “TV Klan”.
Në deklaratën e tij në rrjetin social “Twitter”, kryeministri Rama, duke iu përgjigjur akuzave të opozitës e lidh sekuestrimin e aseteve të televizionit “Agon Channel” me dekriminalizimin e politikës nga elementët kriminalë, një nga temat e nxehta politike që u parapriu zgjedhjeve vendore. “Dekriminalizimi, gjethe fiku që bie e nxjerr cullak PD-në kur goditet krimi! Bllokimi i burimit të parasë së zezë që ushqente ‘Agon Channel’-in, një sukses,” shkruante Rama.
I shtyrë ta shpjegonte postimin e tij në “Twitter” në një intervistë për “Vizion Plus” në datë 12 qershor, kryeministri tha që çështja kundër Beketit kishte të bënte më një skemë të madhe pastrimi parash që është hetuar për një kohë të gjatë. “Kjo nuk ka lidhje me ‘Agon Channel’-in si një media që po luftohet, sepse nuk ka turp më të madh se të bësh avokatinë e ekranit si liri për informim kur ekrani ndizet dhe fiket me burime parash të pista”, tha Rama.
Padia në Strasburg ka si aplikantë përveç Becchettit edhe nënën e tij Liliana Condomiti, ortakun e tij Mauro de Renzis, si dhe financieren e kompanisë “Agon Set”, Erjona Troplini. Të katër aplikantët pretendojnë që deklaratat e Ramës bien ndesh me nenin 6 të Konventës Evropiane për të Drejtat e Njeriut që i referohet prezumimit të pafajësisë.
Përveç shkeljes së prezumimit të pafajësisë, Troplini pretendon gjithashtu shkelje të nenit 3 të Konventës, i cili i referohet torturës dhe trajtimit denigrues, pasi thotë se është vënë në pranga gjatë seancës së masës së sigurisë në Gjykatën e Tiranës, ku ajo është lënë në arrest shtëpie.
