Rreth 11 muaj duhen në Tiranë për të kryer një transaksion në tregun e pasurive të patundshme.Banka e Shqipërisë thotë se gjatë periudhës janar-qershor, koha mesatre e shitjes së banesave në kryeqytet u rrit ndjeshëm, nga 7 që ishte në vrojtimin e mëparshëm. Edhe në rang vendi ky tregues ka pësuar rritje.
“Këtë gjë e kemi hasur që nga viti i kaluar kur kryeministri dha një njoftim që do të kishte një rivlerësim, gjë e cvila nuk ndodhi në vitin 2024 dhe ne tani presim të ndodhë në janar të 2026. Kjo e ka bërë tregun të jetë më i tkurrur sepse ata që nuk e kanë pasur prioritet për të shitur, kanë pritur prioritet për të shitur, kanë vendosur që të presin rivlerësimin. Edhe ata që nuk kanë pasur prioritet për të blerë, kanë pritur rivlerësimin për të bërë blerjen”, shprehet agjenti imobiliar Orgest Beti.
“Çmimet janë rritur. Nganjëherë abuzohet, vendosen çmime më të larta për të procuar tregun. Ndoshta edhe nga agjentët që nuk janë të specializua dhe nuk njohin mirë tyregun. Për një çmim më të lartë duhet edhe një kohë më e gjatë që ajo pronë të shitet”, tha Ervin Demirxhiu, agjent imobiliar.
Fakt është që një pjesë e mirë e shitjeve kryhen me çmim të rishikuar, kryesisht 5% më pak se çmimi fillestar. Në raste të rralla, çmimi i negociuar mes shitësit dhe blerësit arrin edhe deri në 20% më pak.
“Çmimet që janë të publikuara nuk janë asnjëherë finale, ka negociata, kemi klering, nëse një familje ka një mjet, pronë tjetër, ka shkëmbime. Bëjnë që ajo vlerë që kemi afishuar në fillim të mos jetë ajo vlerë transakioni”, Beti.
“Bëhen negocime, ka politika të caktuara të zyrave të pasurive të patundshe. Disa agjentë mundohen t’i rrisin vetë çmimet që më pas të arrijnë te çmimi që do klienti. Unë jam kundër sepse krijon abuzime, por edhe step klientin, blerësin sepse frenohet nga çmime”, Demirxhiu.
Zonat më të preferuara të qytetit janë në vend të dytë për numrin e shitjeve të realizuara. Vendi i parë zihet nga zonat periferike.
“Janë për shtresa të caktuara. Nuk ka çmime fikse, brenda një çmimi futen disa elementë, por çmimet e kullave në Tiranë maksimalisht shkojnë 3-4-5 mijë euro metri katrorë, ndërsa për apartamente me qira shkojnë edhe në 2.000, 2.500 apo ka edhe nga ato që janë me sipërfaqe të madhe dhe çmimi i qirasë arrin edhe në 3.000 euro në muaj”, tha agjenti imobiliar Orgest Beti.
“Zona e qendrës ka kërkesë si nga vendasit, edhe nga të huajt. Janë shumë të kërkuara nga të huajt edhe për investim sepse zonën e qendrën e shohin më të sigurt, më të aksesueshme dhe ka interes”, Demirxhiu.
Në parashikimet për të ardhmen, 54% e agjentëve të pyetur nga Banka e Shqipërisë pohojnë se çmimet e pronave do të jenë të qëndrueshme. Ndërsa 40% e tyre mendojnë se do të rriten më tej, ndikuar edhe nga zhvillimi që pritet në treg me anëtarësimin në BE.
