Gjykata e Lezhës ka rrëzuar kërkesën e Prokurorisë në lidhje me pushimin e hetimeve dhe heqjen e sekuestrit preventiv për objektin që po ndërtohej brenda bazës ushtarake të Shëngjinit dhe disa pronave të tjera aty.
Vendimi u mor nga gjyqtari Ilir Përdeda, i cili ka urdhëruar organin e akuzës të kryejë veprime në lidhje me procedimin penal të regjistruar për veprën penale të “Shpërdorimit të detyrës”.
Hetimet nisën nga Prokuroria e Posaçme Kundër Krimit të Organizuar dhe Korrupsionit (SPAK), por më pas çështja i kaloi për hetim Prokurorisë së Lezhës.
Por pas tre vitesh, organi i akuzës doli në konkluzionin se veprimet e kryera nga institucionet për privatizimin e pronës dhe dhënien e lejes së ndërtimit, brenda bazës detare ushtarake të Shëngjinit, ishin të rregullta dhe nuk kishte elementë të veprës penale.
Objekti katërkatësh brenda bazës së Shëngjinit nisi të ndërtohet 4 vite me parë.
Rasti u denoncua nga ish-zv.komandanti i Forcës Detare, Artur Meçollari, e më pas u vunë në lëvizje Ministria e Mbrojtjes dhe organet e drejtësisë, ku u konstatua se dhe prona të tjera në atë zonë ishin me certifikatë të rregullt pronësie.
Në hetim janë vënë disa ish-zyrtarë lokalë, të cilët dyshohet se kanë vepruar në kundërshtim me ligjin, duke tjetërsuar prona shtetërore në këtë zonë dhe përmes dokumenteve të prodhuara nga institucionet, janë kthyer ne pronë private.
