Prokuroria i është përgjigjur pyetjes se nga kanë dalë fotot intime të politikanit Dritan Prifti. Burime të grupit të hetimit në Prokurorinë e Tiranës, kanë bërë me dije se fotot e Priftit të cilat bënë xhiron në rrjetet sociale në kohë reale, nuk i kishte në laptop.
Pra videoja me pamjet intime të ish ministrit Dritan Prifti, pjesë nga e cila u bënë publike tri ditë më parë, nuk është nxjerrë nga kompjuteri që ai ka dorëzuar në Prokurori në vitin 2011.
Burime të grupit të hetimit në Prokurorinë e Tiranës, që kanë hetuar dosjen “Prifti-Beqiraj”, në vitin 2011, thanë dje se nuk kishin pasur dijeni për një video të tillë deri tri ditë më parë.
“Në atë kohë, për efekt të hetimeve, i është kërkuar shtetasit Dritan Prifti që të dorëzonte kompjuterin laptop të markës ‘Dell’ dhe orën, kamera së bashku me një USB, pasi pretendonte se aty ndodhej materiali filmik në lidhje me shtetasin Ilir Meta”, thanë burimet e Prokurorisë, shkruan “Panorama”.
Sipas tyre, ka qenë vetë Dritan Prifti që me vullnetin e tij është paraqitur në Prokurori dhe pasi ka dhënë shpjegimet e tij, ka dorëzuar laptopin, orën-kamera dhe USB-në. “Dorëzimi i pajisjeve në fjalë është bërë me procesverbal ku është përshkruar gjithçka”, thanë hetuesit. Sipas tyre, këto pajisje janë ekspertuar njëherë në Shqipëri dhe më pas i’u dorëzuan një specialisti amerikan.
