Prokuroria e Gjirokastrës çon në gjyq një person për pastrim parash! Sekuestrohen apartamente dhe një “Benz” në Sarandë

Prokuroria e Gjirokastrës ka përfunduar hetimet dhe ka dërguar në gjyq një qytetar të dyshuar për pastrim parash.Sipas njoftimit zyrtar bëhet me dije se personi me iniciale A.B., dyshohet se ka përfituar të ardhura nga aktivitete të paligjshme në Mbretërinë e Bashkuar. Këto të ardhura, sipas hetimeve, janë investuar në pasuri të paluajtshme në qytetin e Sarandës.
Autoritetet kanë sekuestruar dy apartamente në lagjen ‘ 1 Maji’ dhe një automjet tip ‘Benz’, si pjesë e pasurisë së dyshuar. Dyshohet se përmes këtyre investimeve janë kryer veprime për të fshehur origjinën e të ardhurave.
Njoftimi i plotë:
Prokuroria pranë Gjykatës së Shkallës së Parë të Juridiksionit të Përgjithshëm Gjirokastër, përfundoi hetimet dhe dërgon në gjyq shtetasin A.B., i dyshuar për kryerjen e veprës penale “Pastrimi i produkteve të veprës penale ose veprimtarisë kriminale”, kryer më shumë se një herë, parashikuar nga neni 287 i Kodit Penal.
Nga hetimet paraprake për procedimin penal nr.13, të vitit 2022, rezultoi se ky shtetas ka siguruar pasuri të paluajtshme nga të ardhurat nga veprimtaria e paligjshme në Mbretërinë e Bashkuar. Nëpërmjet investimit në pasuri të paluajtshme në qytetin e Sarandës, si dhe blerjes së automjetit “Mercedes Benz” me të cilin ushtron aktivitetin e shërbimit “transport udhëtarësh”, ky shtetas rezultoi se ka kryer veprime financiare me qëllim shmangien nga raportimi sipas legjislacionit për parandalimin e pastrimit të parave, arsye për të cilën po procedohet penalisht.
Në funksion të hetimit, me kërkesën e Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, u caktua “Sekuestro preventive” mbi pasuritë që i përkasin shtetasit A.B. si më poshtë:
a. Pasuria e llojit “Apartament” me sip. 66.8m2, vendodhje rruga “1 Maji”, Sarandë;
b. Pasuria e llojit “Apartament” me sip. 160.7m2, vendodhje rruga “1 Maji”, Sarandë; dhe
c. Autoveturë “Mercedes Benz”.
Në vijim, Prokuroria pranë Gjykatës së Shkallës së Parë Juridiksionit të Përgjithshëm Gjirokastër, shpreh angazhimin e plotë për vijimin e hetimeve të grup-veprave që lidhen me pasurimin e paligjshëm nëpërmjet marrjes së masave për sekuestrimin dhe konfiskimin e tyre.