Lulzim Berisha ka fituar pak ditë më parë lirinë me kusht, por pavarësisht kësaj Prokuroria e Durrësit ka bërë rekurs në Gjykatën e Lartë, që kreu i bandës së Durrësit të kthehet sërish në burg.
Prokuroria ka argumentuar se lejimi me kusht i Lulzim Berishës nuk legjitimohet për shkak të natyrës së veprave penale për të cilat është dënuar kreu i grupit të bandës së Durrësit. Një tjetër argument sipas prokurorisë është dhe fakti se Lulzim Berisha ka përfituar ulje të pajustifikuar të kohës së dënimit nga gjykata, si dhe se llogaritë e bëra për uljen e dënimit kanë qenë të pasakta.
Lirimi i kreut të bandës së Durrësit është kthyer në kryelajmin e kësaj jave, teksa disa ditë më parë edhe ambasadori i SHBA-së Donald Lu do të shprehej:
“Të mërkurën (5 dhjetor), kreu famëkeq i burgosur i krimit të organizuar Lul Berisha u lirua nga burgu për arsye të panjohura. Ai vuajti më pak se gjysmën e dënimit me 25 vite burg, për gjashtë vrasje, trafik droge dhe krim të organizuar. Të gjithë duhet të indinjohemi nga ky lajm dhe duhet t’u themi gjykatave të korruptuara se në një demokraci kjo është e papranueshme”.
Ish-kreu i “Bandës së Durrësit” u lirua me vendim të Gjykatës së Apelit , ndërsa iu zbritën nga dënimi 5 vite burg.
