Prokurori i Përgjithshëm Olsian Çela raporton në Kuvend: Ka mungesë të theksuar prokurorësh, 97 prona e 6.87 mln euro të sekuestruara vetëm në vitin 2023Prokurori i Përgjithshëm, Olsian Çela ka raportuar dje para Kuvendit raportin për vitin 2023, ndërsa theksin e vendosi sërish tek vakancat e prokurorëve, të cilët përballen edhe me ngarkesë të shtuar. Ndalur në shifra, Çela tha se ka një mungesë të prokurorëve me 38%. Pra, në vitin 2023 prokuroritë kanë pasur 198 prokurorë kundrejt numrit organik prej 321. “Përgjatë vitit 2023 në të gjithë nivelet e prokurorive të juridiksionit të përgjithshëm ka vijuar krijimi i vakancave të përkohshme dhe të përhershme deri në 38 % të prokurorëve (rivlerësimi kalimtar).
Numri më i madh i procedimeve penale të regjistruara sipas tij, rezulton në Prokurorinë pranë Gjykatës së Shkallës së Parë me Juridiksion të Përgjithshëm Tiranë me 35,12 % të numrit total të procedimeve të regjistruara në shkallë vendi; në fund janë prokuroritë Kukës 2,37 %; Dibër 2,31 % ,të numrit total të procedimeve penale të regjistruara në shkallë vendi. Çela u ndal edhe tek pasuritë e sekuestruara dhe konfiskuara përgjatë vitit 2023. “Rezulton se janë sekuestruar rreth 97 prona të paluajtshme, 16 340 m2 truall, 28 746 m2 arë, 11 llogari bankare në vlerën rreth 2,53 milionë euro dhe 434 milionë lekë, në total rreth 6.87 milionë euro etj. Ndërkohë është kryer konfisikimi për 19 pasuri të paluajtshme dhe rreth 500 000 euro”, tha Çela. (Sot)
