Menjëherë pas kërkesës publike që kryeministri Isa Mustafa dhe zëvendësi i tij Hashim Thaçi ua kanë bërë “institucioneve të ligjit” në seancën e improvizuar të buxhetit, për të marrë masa ndaj deputetëve që kanë pamundësuar mbajtjen e seancave të rregullta të Kuvendit, tani është caktuar një prokuror që të lëshojë urdhërarrest ndaj katër deputetëve që kanë aktivizuar gazin lotsjellës, shkruan më gjerësisht Koha Ditore.
Pak ditë më parë forcat e policisë speciale janë vënë në aksion duke bastisur shtëpitë e Albin Kurtit, Albulena Haxhiut dhe Faton Topallit nga “Vetëvendosja”, si dhe të Donika Kadaj Bujupit nga AAK-ja. Tre të parët nuk kanë qenë në shtëpitë e tyre, ndërsa deputetja e AAK-së, Kadaj-Bujupi, është arrestuar, edhe pse ftesa që i është dërguar për t’u paraqitur në polici ka pasur afat edhe një javë, deri më 24 nëntor.
Arrestimi i deputetëve është cilësuar nga njohësi i çështjeve juridike, italiani Andreas Capusseal, si jokushtetues dhe politik, i cili, sipas tij, mund të hapë rrugë për arrestime të tjera.
