Mësuesit e arsimit parashkollor, të arsimit fillor dhe të arsimit të mesëm do të ushtrojnë profesionin e mësuesit, vetëm pasi të kalojnë me sukses një testim psiko-emocional.
Kështu parashikon një projektligj i depozituar në kuvend nga nisma e tri deputete, Albana Vokshi, Mesila Doda dhe Majlinda Bregu.
Për shkak të shtimit të rasteve të dhunës në shkolla e kopshte, në muajin tetor, këto deputete kanë kërkuar ndryshimin e ligjit “Për sistemin arsimor parauniversitar” ,ku kërkohet që të gjithë mësuesit dhe edukatorët të kontrollohen nga ana psikologjike dhe emocionale para se të punësohen dhe periodikisht gjatë viteve të ushtrimit të këtij profesioni.
Vlerësimi psiko-emocional është procesi i mbledhjes së informacionit në lidhje me një person brenda një shërbimi psikologjiko-psikiatrik, me qëllim për të përcaktuar një diagnozë.
Vlerësimi përfshin informacion social dhe biografik, vëzhgime të drejtëpërdrejtë dhe të dhëna nga analiza psikologjike. Ky vlerësim kryhet zakonisht nga një psikiatër por mund të jetë një process multidisiplinor që përfshin infermierë, psikologë, punonjës socialë. /a.m.
