Projektligji i qeverisë, kush ka detyrime tatimore pa paguar i bllokohet llogaria bankare
Qeveria ka hartuar nëe projektligj i cili parashikon disa masa shtrënguese në luftën kundër informalitetit. Çdo biznes që ka detyrime financiare kundrejt administaratës tatimore do të monitorohet nga inspektoret tatimorë dhe do t’i konfiskohet 50% e xhiros. Gjithashtu subjektet debitore nuk mund të bëjnë asnjë lëvizje bankare apo ta shesin biznesin. Ndërsa thirrja e kryeministrit për të mos paguar në rast se nuk jepet kuponi tatimor tashmë është konkretizuar në një nen të këtij projektligji, raporton Abcnews.
Pak ditë më parë një i ri nga kryeqyteti e ndoqi në letër këshillën e kryeministrit dhe refuzoi të paguante në një lokal në Tiranë. Por ky xhest rezultoi fatal për të riun, i cili u godit me grushta nga kamarieri i lokalit.
Kjo thirrje e kryeministrit në luftën kundër informalitetit nuk ngeli vetëm në formën e propagandës. Qeveria tashmë këtë norme dhe disa të tjera i ka përfshirë në projektligjin që ka hartuar së fundmi. Ky projektligj parashikon disa ndryshime të rëndësishme në ligjin e tatimeve. Konkretisht shtesa në nenin 11 u jep të drejtën inspektorëve tatimorë që për të gjithë ato subjekte që kanë detyrime të papaguara, t’u konfiskohet 50 % e xhiros ditore. Administrata tatimore mund të angazhojë strukturat e saj për të verifikuar dhe monitoruar në vend aktivitetin tregtar të tatim paguesit. Pagesa e shumës së qarkullimit të sekuestruar kalohet në llogarinë bankare të administratës tatimore ditën e nesërme. Por masat shternguese nuk përfundojnë këtu. Tatimpaguesi, për të cilin administrata tatimore ka filluar mbledhjen me forcë të detyrimeve tatimore të papaguara, nuk mund të kryejë asnje transferim bankar të parave nga llogaria e tij apo të shesë, të transferojë aktivet, ose kapitalet e shoqërisë, me përjashtim të rasteve kur, nëpërmjet shitjes ose transferimit të aktiveve, synohet shlyerja në masën 100% e detyrimit tatimor të papaguar.”
Një ndryshim tjetër i rëndësishëm është edhe sigurimi i punonjësve nga bizneset private. Nëse nga verifikimi dhe kontrolli në vendndodhjen e biznesit rezulton se tatimpaguesi nuk ka deklaruar në organin tatimor çdo të punësuar rishtazi, të paktën një ditë kalendarike, tatimpaguesi dënohet me gjobë prej 500 000 lekësh.
