Policët e Tiranës duke nisur që nga shtatori do të pajisen me kamera në trup, të cilët do të monitorojnë çdo veprim të tyre gjatë detyrës. Kjo nismë interesante, është bërë publike ditën e sotme nga kryeministri Edi Rama dhe Ministri i Brendshëm Saimir Tahiri.
Bëhet fjalë për “spiunë dixhitalë”, pra për kamera të cilët do të vendosen në trupin e gjithësecilit prej uniformave blu. Ky projekt, do të nisë fillimisht në Tiranë për t’u shtrirë më pas gradualisht në të gjithë vendin.
Siç theksoi edhe kryeministri Edi Rama, kamerat do të jenë të lidhura me sallën qëndrore operative të Policisë së Shtetit, nga ku do të mbikqyret e gjithë puna e oficerëve të policisë. Projekti synon të largojë abuzimet në detyrë, si dhe të thjeshtëzojë dhe përmirësojë shërbimin e policisë. Shefi i qeverisë nënvizoi se me kamerat e vendoura, tashmë do të jetë lehtësisht e kontrollueshme lëvizja, efiçenca dhe puna që kryen çdo patrullë policie në çdo moment.
“Shumë shpejt do të dalë në dritë një hap tjetër i rëndësishëm për vënien në dispozicion të teknologjisë së re, në transformimin fizik të trupave të policisë në terren përmes lidhjes online të çdo polici në terren me sallën operative të monitorimit të veprimtarisë së policisë së shtetit. Ky projekt do të fillojë në vjeshtë me Tiranën. Ata do të jenë të lidhur përmes kamerave që do të kenë në trup me qendrën operative. Ata do të monitorohen për gjithçka: lëvizjen, sjelljen e gjithçka tjetër. Kjo do të sjellë një lehtësi shumë të madhe për drejtuesit për të kuptuar planin dhe efektivitetin e çdo patrulle si dhe nivelin e efektivëve për përdorimin e të gjitha paisjeve që kanë në dispozicion. Kjo do të ndihmojë që askush të mos ngrejë telefonin për të pretenduar që polici apo patrulla e policisë i ra më qafë kot, që sjellja e tyre ishte brutale, që askush të mos mundohet të manipulojë policin kur ka një ankesë sepse çdo gjë do kontrollohet me zë e figurë. Çdo polic do jetë i monitorueshëm në çdo sekond të veprimtarisë së tij. Projekti që do fillojmë në Tiranë dhe do të përhapet në të gjithë Shqipërinë.” Theksoi kryeministri Rama
Deri më tani oficerët e policisë, përkatësisht forcat speciale Shqiponja, janë të pajisur në automjetet e tyre me kamera të cilat monitorojnë punën e tyre. Por nga shtatori, tashmë të gjithë uniformat blu, do të “vihen nën lupën” e kontrollit dhe monitorimit.
