Projekti i Superligës së futbollit ka hyrë në momentin vendimtar. Reali i Madridit, Barcelona dhe Juventusi, klubet rebele që mbeten ende pjesë e projektit, denoncuan qëndrimin e UEFA-s si monopol. Akuza është ngritur në Gjykatën Europiane të Drejtësisë në Luksemburg.
Denoncimi i ka hapur rrugën nisjes së shqyrtimit të çështjes, e cila mund të ndryshojë në mënyrë rrënjësore organizimin e futbollit në Kontinentin e Vjetër, apo mund të shuajë përfundimisht ambiciet për një turne, ku marrin pjesë vetëm skuadrat e mëdha.
“Jemi në mbrojtje të lirive, të cilat e bëjnë Bashkimin Europian një territor unik në botë. Kemi ardhur të luftojmë kundër praktikave anti-ekonomike”, tha Miguel Odriozola Alen, avokati mbrojtës i projektit të Superligës, në ditën e parë të prezantimit të akuzave.
Bazuar në kërkesën e një gjykatësi në Madrid, denoncimi i tre klubeve mbështetet te teza e pretenduar e abuzimit me pozicionin dominues që UEFA ka në futbollin kontinental. Gjykata Europiane e Drejtësisë do të shqyrtojë të gjithë argumentet e palëve të përfshira, por verdikti nuk pritet të jetë i shpejtë. Sipas mediave ndërkombëtare, vendimi nga institucioni në Luksemburg pritet të vijë në fundin e vitit 2022, apo edhe në fillim të 2023-shit.
/a.r
