Komisioni i Venecias ka përfunduar projekt Opinionin e tij përfundimtar mbi ndryshimet kushtetuese të rishikuara në bazë të sugjerimeve të tij të mëparshme. Komisioni thotë se varianti i rishikuar ka marrë parasysh pjesën dërrmuese të rekomandimeve në opinionin e saj të ndërmjetëm.
Një ndër pikat e cila kishte shkaktuar më shumë debat ishte lidhur me shumicën e nevojshme për zgjedhjen nga ana e parlamentit të anëtarëve të disa institucioneve të drejtësisë, si Këshilli i Lartë Gjyqësor, apo Këshilli i Lartë i Prokurorisë. Opozita ka këmbëngulur për zgjedhjen e tyre me dy të tretat, e jo me tre të pestat sic eshtë propozuar në variantin e ekspertëve të nivelit të lartë, Komisioni i Venecias thotë se të dy variantet janë legjitime. Ai thekson megjithatë si më të pranueshëm variantin me tre të pestat, po ku të garantohet përfshirja dhe e opozitës, duke dhënë edhe disa alternativa për arritjen e këtij qëllimi. Edhe në rastin e Gjykatës Kushtetuese, Venecia sugjeron zgjedhjen me një shumicë të cilësuar.
Komisioni nuk e sheh me vend ndërprerjen e mandatit të Prokurorit të Përgjithshëm “përsa kohë ai do të duhet t’i nënshtrohet procesit të verifikimit dhe kontrollit”, ndërsa mandate I tij duhet të mbyllet në mesin e vitit 2017. Opinioni i Komisionit e quan “të pranueshëm mekanizmin e zgjedhjes së Prokurorit të Përgjithshëm dhe të Isnpektorit të Lartë të Drejtësisë, përmes propozimeve me disa kandidatura të ardhura nga Këshilli i Lartë i prokurorisë dhe Këshilli i Lartë Gjyqësor, me tre të pesta e parlamentit”, ndërkohë që sugjeron si variant alternativ edhe “zgjedhjen e tyre, për herë të parë, me dy të tretat”.
Përsa i përket masave të parashikuara për procesin e kontrollit dhe verifikimit të figures, të cilit do të duhet t’i nënshtrohen gjyqtarët dhe prokurorët, Komisioni e konsideron “jo vetëm të justifikuar por edhe të nevojshëm” në situatën në të cilin ndodhet gjyqësori shqiptar
Komisioni vlerëson pozitivisht variantin e rishikuar të ndryshimeve kushtetuese, i cili sipas tij, është gjerësisht koherent dhe në përshtatje me standartet europiane./VOA
