Edicioni i këtij viti i Gjon Mili International Video Art Festival do të zhvillohet më 27–29 qershor 2026 në Producers Club Theaters në Manhattan, me moton “Are You Dreaming?”.
Për tre mbrëmje me radhë publiku do të ketë mundësinë të ndjekë filma të shkurtër, dokumentarë, video-art dhe filma të animuar nga autorë të vendeve të ndryshme të botës, si Australia, Italia, Franca, Gjermania, Brazili, Shtetet e Bashkuara, Kanadaja, Tajvani, Monako, Sllovakia dhe Shqipëria.
Mbrëmja e parë, më 27 qershor, hapet me një program të larmishëm ku spikasin dokumentari “Haus Tumbuna”, video-arti “Kingdom of Animals” dhe në fund dokumentari kanadez “Violence Solves Everything”.
Më 28 qershor, festivali vazhdon me një tjetër program ndërkombëtar, ndërsa në orën 20:30 do të shfaqet dokumentari “Dezo Hoffmann – Photographer of the Beatles”, kushtuar fotografit të njohur të grupit legjendar The Beatles.
Dita e fundit, më 29 qershor, i kushtohet në një pjesë të mirë krijimtarisë shqiptare. Do të shfaqen filmat “The Champ” i Ermir Ketës, “Antimuzeu” i Renis Hykës, “SOS” i Anita Morinës dhe dokumentari i shkurtër “Kecka” i Fatjet Bajramit. Më pas publiku do të ketë mundësinë të ndjekë versionin e restauruar të filmit klasik shqiptar “Kapedani” (1972), me regji të Muharrem Fejzos dhe Fehmi Hoshafit.
Organizatorët ftojnë pjesëmarrësit që, krahas aktiviteteve të festivalit, të shfrytëzojnë qëndrimin në Nju Jork për të vizituar muzetë, galeritë, lagjet historike dhe qendrat kulturore të qytetit, duke e kthyer festivalin në një përvojë artistike dhe kulturore më të gjerë.
