Programi pas shkollor, i cili pritet të nisë zbatimin në shtator të këtij viti, do të zbatohet në 50 shkolla në kryeqytet dhe në 2 në Kamëz. Në Ministrinë e Arsimit thonë se nga ky program do të përfitojnë nxënësit e ciklit të ulët, nga klasa e parë deri në klasën e pestë.
“Për arsye të qëndrimit për një kohë të shkurtër të fëmijëve nga klasa e parë deri në klasën e pestë, të cilët mbarojnë 11:20 dhe 12:20, do të jetë ky target-grup i cili do të zbatohet pas shkollori me dy fasha të rëndësishme: të bëjmë detyrat e shtëpisë, po ashtu klubet e arteve dhe zejeve, në një fashë të tretë, ku këto lëndë nuk do të jenë formale mësimore, por aktivitete në klasa dhe ambientet shkollore”, thotë zv/ministrja e Arsimit, Herida Duro.
Koha e qëndrimit në shkollë do të jetë afërsisht deri në orën 15:00.
“Duke pasur në fokus nevojat e nxënësit për t’u përshtatur në infrastrukturë dhe burime njerëzore në bazë të orëve të mësimit, midis klasave të 1/2/3, fasha e parë mbaron në 2 të drekës dhe klasat e 4/5 rreth orës 3 të pasdites, por do të zgjatet në vijim”, shprehet Duro.
Zëvendësministrja Duro dha dy arsye për qëllimin e kësaj iniciative: “Reformimi i këtij sistemi, pasi Shqipëria ka kohën e qëndrimit më të shkurtër të fëmijëve në shkollë dhe për shkak të prindërve që janë të punësuar në privat apo publik, ne vijmë me këtë program me financim nga qeveria, për mësuesit që do të paguhen mbi pagën e tyre bazë, me 10 mijë lekë të vjetra për 60 minuta”.
Krahas mësuesve të angazhuar, nga ky projekt do të përfitojnë edhe ata kandidatë që janë në listë pritjeje, si dhe mësuesit që sapo kanë dalë në pension.
“Ne po përgatisim një plan për rekrutimin e të gjithë mësuesve të sistemit, që përmes SMIP mund të paraqesin kërkesën dhe interesin e tyre. Programi pas shkollor nuk është i detyrueshëm për mësuesit dhe nxënësit. Përtej mësuesve që i kemi pjesë të sistemit tonë, do të vijojmë me mësues që janë në pritje në portal dhe do të fillojnë pa konkurs. Më tej do të vijojmë me fashën e tretë të mësuesve që kanë dalë në pension dhe do të kontraktohen sipas profileve specifike. Do të hapim disa thirrje për specialistë të fushave, si kërcimtarë, solistë, koristë”, shton zv/ministrja.
Ky projekt, me financimin e qeverisë shqiptare, kap vlerën e 5 milionë eurove, të cilat do të shërbejnë jo vetëm për pagesat e mësuesve, por edhe për plotësimin e shkollave me nevoja didaktike për këtë program.
