Gjermania sjell sërish në Tiranë një grua si ambasadore, pas znj. Holtekember që e mbajti këtë mandat pak vite më parë, e zëvëndësuar më pas nga Hoffman.
Susanne Schütz është emëruar një muaj më parë nga qeveria e Berlinit dhe para pak ditësh ka dorëzuar letrat kredenciale tek presidenti Bujar Nishani.
Në fakt, si edhe herët e tjera që kanë qenë diplomat shumë të rëndësishëm, edhe këtë herë Gjermania ka emëruar në Tiranë një “peshë të rëndë”.
Zonja Schütz, përpara se të vinte në Tiranë ka shërbyer si zv.ambasadore e Gjermanisë në Ukrainë, ka shërbyer dhe në Romë si këshilltare diplomatike.
Megjithatë, punën më të rëndësishme në Ministrinë e Jashtme gjermane, ambasadorja e re në Tiranë e ka bërë kur ka drejtuar të ashtëuquajturin “Divizioni 205” që është më i rëndësishmi i Shërbimit Diplomatik të Berlinit, pasi përgatit analizat mbi zhvillimet më të rëndësishme në Europën Lindore dhe Ballkan.
Nuk është rastësi që pikërisht kreu i këtij divizioni emërohet në Tiranë, kur Berlini ka marrë një rol të rëndësishëm në udhëheqjen e spastrimit të politikës dhe drejtësisë shqiptare nga zyrtarët e korrupsionit, shkruan Tesheshi.com.
“Divizioni 205” është hartuesi i politikave që Bashkimi Europian duhet të ndjekë më vendet e Ballkanit dhe që vëzhgon luftën ndaj korrupsionit.
Siç duket, misioni më i ri i zonjës Schütz do të jetë koordinimi edhe me zyrën e gjermanit tjetër në BE, Reinhard Priebe, e cila do të udhëheqë procesin e kalimit në sitë të gjyqtarëve dhe prokurorëve të vendit.
Në ditën e dytë të punës së saj në Tiranë, ambasadorja e re gjermane ka nënshkruar një program me qeverinë shqiptare që kushton 41 milion euro.
Ky program përbën financimin e të gjithë procesit të ekspertizës dhe punës së ekpsertëve të BE-së për reformimin e sistemit të drejtësisë në Shqipëri.
Gjatë konferencës së përbashkët për shtyp, së bashku me zv.kryeministrin Peleshi, ambasadorja e re gjermane e konfirmoi këtë synim të Berlinit kur tha:
“Bashkëpunimin tonë për zhvillim e shikojmë si një pjesë mjaft të rëndësishme të bashkëpunimit në terësi me Shqipërinë në rrugën e saj drejt BE. Gjermania është e gatshme të vazhdojë të mbështesë edhe më tej Shqipërinë në rrugën drejt BE, në realizimin e reformave të nevojshme për këtë zhvillim, përmirësimin e kushteve të jetesës për popullësinë shqiptare sikurse dhe krijimin e prespektivave për brezin e ri. Gjermania do vazhdojë të mbesë një partner besimplotë i Shqipërisë në rrugën e saj për ndërtimin e një sistemi demokratik”.
