Dorëheqja sot e ministrit të transporteve, Edmond Haxhinasto, duket se ka ngjallur jo pak vëmendje publike dhe politike. Në disa aspekte kjo dorëheqje mund të ishte dhënë shumë kohë më parë, me motive shumë më të ndryshme nga ato që ka deklaruar sot “për punë partie”.
Haxhinasto njihet gjerësisht si një nga bashkëpunëtorët më të afërt të kreut të LSI-së, Ilir Meta. Haxhinasto largohet nga qeveria në një moment kur spekulimet mbi ndryshime në kabinetin “Rama” sa vinë e shtohen. Nga ana tjetër lëvizja e Metës për të larguar Haxhinaston ha jo pak debat, po të kemi parasysh faktin se ai është një nga themeluesit e kësaj force politike dhe bashkëudhëtarë me Metën në qeverisje si gjatë kohës kur LSI ishte në koalicion me PD ashtu edhe gjatë kësaj periudhe kur LSI është në koalicion me PS-në.
Por mbijetesa e Haxhinastos në qeveri të drejtuara nga Berisha dhe Rama duke qenë herë si Zëvëndësministër i Punëve Publike dhe Transporteve, herë si Ministër i Jashtëm, herë si Ministër i Ekonomisë, Tregtisë dhe Energjisë, herë si zëvëndëskryeministër dhe së fundmi edhe si Ministër I Transporteve, është shoqëruar me jo pak dritë- hije. Ai në jo pak raste është vënë në qendër të akuzave të opozitës së djeshme dhe asaj të sotme për rolin e tij si ministër në dhënien e disa ekskluziviteteve që kanë krijuar monopole rrënuese për ekonominë dhe interesin publik si në fushën e kromit, gurorereve, argjilave, çimentos, si dhe në dhënien po në këtë formë të burimeve ujore, prodhimit të energjisë, ndërtimit e porteve private, shërbimeve të parkingjeve, ngarkim shkarkimeve etj.
Haxhinasto mund të konsiderohet një nga ministrat me numërin më të madhe të interpelancave që janë kërkuar nga deputetët me një ministër. Ndonse jo me profil të lart politik brenda rradhëve të LSI, pavarësisht se ka mbajtur poste të rëndësishme partiake dhe është anëtarë i kryesis, si qeveritarë duket se ka pasur jo pak “shkëlqim”, duke qenë një ministër që ka menaxhuar jo pak interesa biznesi, të cilat duke se janë kthyer në një barrë për shoqërinë shqiptare për shumë vite që do të vinë. Goxha arritje për një njeri i cili ka mbaruar për anglisht, por që gjithë kohës ka menaxhuar interesa biznesi. Dorëheqja e tij sot mbase ngjall debate. Por për hirë të realitetit ai duhet të kishte dhënë dorëheqje me kohë, që kur nuk largoi nga puna shefin e kabinetit të tij, i cili për hir të biznesit të babait, gjymtoi projektin e trafikndarëses në Durrës, duke shkaktuar vdekjen e dy fëmijëve. Dorëheqja e tij në atë kohë do të ishte një akt shumë më i ndershëm se sa kjo dorëheqje e detyruar që dha sot.
Javanews
