Të rinjtë që u përplasën sot me policinë, duke kundërshtuar këndin e lojërave për fëmijë të liqeni, janë pjesë e një grupimi që quhet Organizata Politike, të cilët identifikohen edhe si komunistët e rinj. Mblidhen çdo ditë në një shtëpi private, pranë 21 Dhjetorit, të quajtur Logu i Shkëndijes, ndërkohë që në derën e vilës kanë piktuar edhe një trëndafil, simbol i majtë.
Nuk është hera e parë që ata protestojnë duke përdorur veprime të dhunshme, pasi prej kohësh janë angazhuar në disa protesta kundër reformës arsimore, e me sa duket përdorin çdo mjet për t’u kthyer në faktor dhe të qenurit në qendër të vëmendjes e kanë kthyer në çështje parësore.
Sot në mëngjes ata kanë hedhur në faqet sociale foto të tyre, ku me grushtin lart (simbol i Partisë së Punës së ish diktatorit Enver Hoxha) paralajmëronin organizimin e protestës së radhës, po ashtu edhe dhunën. Pak kohë para se të niste protesta e tyre, në faqen sociale Facebook, të rinjtë janë shprehur të gatshëm të përplasen edhe me policinë dhe të mos ndalen në rrugën e tyre.
“Gati për aksion. Fryma është e lartë. S’ka polic që na ndal dhe ca ira, a ca ira”, shkruajnë aktivistët ku shfaqen të grumbulluar së bashku pak minuta përpara nisjes së protestës.
