Profesori universitar, Florim Isufi, ka thënë se matja e territorit është gjë e mirë, por kjo duhet të bëhet vetëm atëherë kur bëhet demarkimi i tërë territorit të vendit.
Isufi, në një bisedë në Interaktiv të KTV-së, ka thënë se Komisioni i formuar nga Qeveria për matjen e territorit nuk do të prodhojë asgjë, përveçse një alibi që do të shfrytëzohet nga Kryeministri për të thënë se Kosova nuk humb territor.
Profesori Isufi tha se nuk është ftuar nga askush për të marrë pjesë në këtë komision.
Isufi thotë se ky proces nga ana e Qeverisë nuk është i logjikshëm. Kjo pasi, siç tha ai, në bazë të disa rezultateve nga analizat që i kanë bërë, është konstatuar se Kosova ka humbur territor.
“Me siguri se javën tjetër do t’i publikojmë këto të dhëna. Do t’i tregojmë Qeverisë se Kosova ka humbur territor”, ka theksuar Isufi, duke mos treguar se sa është kjo humbje, raporton Koha.net.
Ai tha se shifra që është mësuar në lëndën e gjeografisë se Kosova ka 10887 km2 nuk është e saktë. Isufi thotë se komisioni qeveritar do të konstatojë se Kosova ka rreth 20 km2 më shumë se shifra e mësuar deri tani.
Isufi nuk deshi që të tregojë se sa territor ka në të vërtetë Kosova, sipas hulumtimit të tyre shkencor, por tha se së shpejti do të bëhet publik. (b.an)
