Rikthehet në Gjykatën e Lartë më 6 shkurt 2017, procesi gjyqësor ndaj deputetit Tom Doshi, ish-deputetit Mark Frroku dhe shtetasit Durim Bami. Doshi, Frroku e Bami janë marrë të pandehur për akuzën e kallëzimit të rremë nga Prokuroria e Përgjithshme, ndërsa prej më shumë se 6 muaj procesi ndaj tyre u ndërpre për kompetencë.
Kolegji Penal i Gjykatës së Lartë kërkoi nga Gjykata Kushtetuese që të vlerësonte nëse mund të gjykoheshin të tre bashkë Doshi, Frroku e Bami apo duhej që ky gjykim të veçohej për Frrokun e Bamin, pasi ata nuk gëzojnë statusin e personit që gjykohet nga gjykata e lartë.
Më 5 nëntor, Kushtetuesja vendosi që ky gjykim të vazhdojë pranë Gjykatës së Lartë, ndërsa pritet të vendoset nëse kjo akuzë ndaj tre të pandehurve do të pushohet apo jo prej amnistisë. Doshi, Frroku e Bami u vunë nën akuzë pas denoncimit publik që deputeti Doshi bëri se ndaj tij ishte porositur një atentat për ta eliminuar fizikisht.
