“Sulm politik, asgjë më shumë”. Kështu e ka quajtur ish-deputeti i Kuvendit të Shqipërisë Eduard Ndocaj momentin e shoqërimit të tij në Policinë e Lezhës.
Ai reagoi për Express duke thënë se tashmë ndodhet në Itali, dhe se nuk ka probleme ligjore.
Policia tha se Ndocaj u shoqërua gjatë ditës së djeshme, ku u kap në portin e Durrësit, pasi ndaj tij ishte depozituar një kallëzim në Policinë e Lezhës nga një shtetas italian që pretendon se është mashtruar nga Ndocaj. Sipas denoncimit të italianit, Ndocaj i ka marrë një shumë te konsiderueshme parash (flitet për 78 mijë euro), përmes mashtrimit. Por pas verifikimeve të kryera, policia tha se Ndocaj u la në gjendje të lirë dhe se dosja me materialet procedurale ju referua për hetim të mëtejshëm Prokurorisë.
Të gjitha këto, vetë Ndocaj i quan sulme politike, por se nga kush?! Ai nuk jep një emër.
Dje Ndocaj ishte paraqitur në Portin e Durrësit për të udhëtuar me traget drejt Italisë, “shtëpinë e tij të dytë”. Por udhëtimi është anuluar, dhe ish-deputeti e ka prerë biletën për ditën e sotme pasi u la i lirë nga policia./a.m.
