Përfaqësuesi special i Kinës Wang Yi, shtrëngon duart me përfaqësuesin special të Indisë Shri Ajit Doval në Pekin. Kinë, 18 dhjetor 2024/Ministria e Jashtme e Kinës
Përfaqësuesit e posaçëm të Kinës dhe Indisë mbi problemin e kufirit organizuan mbledhjen e 23-të në Pekin të mërkurën, duke arritur një konsensus prej gjashtë pikash. Kjo është mbledhja e parë e këtij lloji në pesë vjet.
Të dy palët pranuan të vazhdojnë marrjen e masave për të ruajtur paqen e qetësinë në rajonet kufitare dhe për të promovuar zhvillimin e marrëdhënieve dypalëshe në mënyrë shëndetshme e të qëndrueshme, duke vazhduar të kërkojnë gjetjen e një zgjidhjeje për problemin e kufirit që është e drejtë, e arsyeshme dhe e pranueshme për të dy palët në përputhje me parimet politike drejtuese të arritura në vitin 2005.
Ata ranë në një mendje gjithashtu të përsosin më tej rregullat për menaxhimin e zonës kufitare dhe të forcojnë masat e forcimit të besimit, të vazhdojnë rritjen e shkëmbimeve e të bashkëpunimit ndërkufitar për të nxitur rifillimin e vizitave të pelegrinëve indianë në Xizang të Kinës dhe të forcojnë më tej punën për formimin e mekanizmit të mbledhjes së përfaqësuesve të posaçëm.
Një mbledhje ndërmjet përfaqësuesve të posaçëm do të organizohet në Indi vitin tjetër, sipas këtij konsensusi.
Gjatë takimit, të dyja palët theksuan rëndësinë e marrëdhënieve të qëndrueshme, të parashikueshme e të shëndetshme kino-indiane për paqen dhe qëndrueshmërinë ndërkombëtare e rajonale.
Përfaqësuesi i posaçëm i Kinës Wang Yi, gjithashtu anëtar i Byrosë Politike të Komitetit Qendror të Partisë Komuniste të Kinës dhe drejtor i Zyrës së Komisionit Qendror për Punët e Jashtme, theksoi se liderët e të dy vendeve u takuan në tetor në Kazan të Rusisë dhe arritën një konsensus të rëndësishëm për përmirësimin dhe zhvillimin e marrëdhënieve dypalëshe, që përcakton kursin dhe drejtimin për rimëkëmbjen dhe zhvillimin e marrëdhënieve kino-indiane në një moment kritik.
Përfaqësuesi i posaçëm i Indisë, Këshilltari i Sigurisë Kombëtare Shri Ajit Doval, vuri në dukje që India dhe Kina kanë interesa të përbashkëta e pikëpamje të ngjashme, duke shtuar se është e nevojshme që të dy vendet të bashkëjetojnë në mënyrë paqësore dhe të zhvillohen së bashku.(Xu Guang)
